الغيم لو داعب جبـال السـراوات=الشعر ينبت مـن ربـاه ووهـاده
ياللي تحرضني على بدع الابيات=ماعادلـي فالشعـر شـفِّ وراده
احسن منه لو انّي اقرالـي آيـات=بعد الفريضة في بيـوت العبـادة
والاّ اركع اليا هوّد الليل ركعـات=وقت السحر والليل مسدل سـواده
وارفع يديني تالي الليـل لحظـات=لحظات ربّـي يستجيـب لعبـاده
اوقات فيهـا تسّتحـب المناجـاة=ومغادر فراش الدفـى والوسـادة
تجري بنا الدنيا بـدون اتجاهـات=احيان نغوى عن دروب الرشـاده
واحيان نمشيها على كيف ماجات=ماهيب حسـب المعرفـة والارادة
ندلّهـا مـرات ونضيـع مـرات=ولا كل مخلـوقِ يحصّـل مـراده
بين الفرح والحزن نقطع مسافات=فيهـا نـدوّر للونـس والسعـادة
احلامنا كالغيـم غطّـا مساحـات=لكن مايصفـى لـلارض بـوداده
المسعد اللـي ماغـدا فالمتاهـات=قـدّم لنفسـه قبـل تبلـى جـداده
والشعر ماهو من عظيم الكرامات=هرْج العـرب والابجديّـة مـداده
مليون شاعـر عانهـم فالقنـاوات=شباب واطفـال وبنـات وعـواده
كلَّ يقـول انـا زعيـم المهمـات=الفـارس اللـي ماتعثّـر جـواده
ثلثينـه مهايـط ورب السمـاوات=يحتـاج جـرّاح ودوا فالعيـادة
الشعر يبقى حي لو شاعره مـات=وبديوي الوقداني اصْـدق شهـادة
وفالحاضر الراهن رموز وعلامات=وكلِّ يدوّرلـه مثـل مـن بـلاده
اشعارهم تاريح مجد وحضارات=وتبقى على صدر الفصاحة قـلادة

الــورد للورد من يستاهله غيرك=مساك ورد وصباحك ورد يالغالي
ياكبر سطوتك في قلبي وتأثيرك=مزروع فاحْساسي وفي شرفة آمالي
الورد ينطق ب احاسيسك وتعبيرك=يسأل عن اوضاعي وينشد عن احوالي
نهب خفوقي وحلّق فالفضاء طيرك=ارجوك خلّه معك في برجك العالي
احلى مشاوير فالدنيا مشاويرك=لو في صحارى النفود وفالخلى الخالي
اشراقة الروح من فجرك وتنويرك=مع كل نبضة غلا تطري على بالي

علامك تجر النوح ياطاير الاشجان= وانا اخْبرك لوضاقت عليك الوساع تطير
تسلّفني الجنحان يامطلق الجنحان=اخذ كلّ شيِّ واعطني كل شي ياطير
ولابيننا كاسب ولابيننا خسران=ترا السالفة تغيير لمجرّد التغيير
اليا كنت متميّز وتشْدو على الاغصان=تغرّد على خضر النوامي ضحى وعْصير
فأنْا افخر بنفسي وافخر بربعي العتبان=اخاوي هل الطالات واعشق نوايا الخير
واليا كنت ترقى فوق لمعانق الامزان=تسبّح بحمد المعتلي صاحب التدبير
ف انا اسجد لربي واعبده واقرأ القرآن=واصلّي على خير البشر مشعل التنوير
واحب الملك والشعب واموت فالاوطان=واقدّر رجال العلم واهل الفكر تقدير
واحب الرماية والشعر واخضر الالوان=تولّعت فالاهلي وتوّي وراع صغير

المشاركة الأصلية كتبت بواسطة عبدالله الفهد الاسعدي (المشاركة 1043249) اخ هلال لست بحاجة الى شهادتي ولكن الحق يقال انت بارع بكل المقاييس استمتاع كامل مع كل نص شعري فاخر دمت موفق لكل خير

المشاركة الأصلية كتبت بواسطة رايدالجعيد (المشاركة 1043611) الله أكبر الله أكبر الله أكبر بيض الله وجهك شاعر سبك و حبك و معنى و جزاله و و و و و و و و و لا بد أن تثبت هذه الأوراق المكتوبة بماء الذهب من شاعر مبدع رووووووووووووووووووووووووووعة تقبل إعجابي و مروري و صح لسانك مليوووووووووووووووون

المشاركة الأصلية كتبت بواسطة ابو سيف الميلبي (المشاركة 1044654) صح السانك ياهلال على هذا القصيده اياه المبدع ونطمع فى الجديد