بدعت قاف(ن) يطرب اللي يغنون=بحر(ن) غنائي كله أفنون وابداع
يزيل هم(ن) داخل النفس مكنون =يريح الخاطر ليا منه أنذاع
الله من قلب(ن) خذه حب مزيون=يابدر قلبي من هوى البيض ملتاع
هاذي ثلاث اسنين من دون مضمون=يابدر عين لا يزينن الاوضاع
أنوح نوح الورق في عالي أغصون=يلعبها النسناس مع كل ذعذاع
وأقنب قنيب الذيب والذيب مغبون=والذيب يقنب عشق مدري ليا جاع
يازين حبك داخل القلب مسجون=عليه ياحبي يصكن الاضلاع
ما داخل(ن) في صاحبي شك وضنون=لو يهرج الهراج سكرت الاسماع
ينطق بحكمه وأن ضحك كله أفنون=انسان حلو السان ولهرجه انصاع
عنق المها طوله رها أسود عيون=لا شافها راع الهوى فز وارتاع
القلب عندك ياريش العين مرهون=أوداعتك لا تضيع وأنته لها راع
قيس الملوح فالهوى صار مجنون=حسبي على ليلى بعد قيس ماضاع
في حبها يابدر مبلي ومفتون=شكيت لك يابدر ياطايل الباع
خابرك رجال(ن) كما السيف مسنون=تضرب على القاسي وياسرع ماطاع
نصيت لي رجال والناس يدرون=قرم(ن) شجيع(ن) من تنصاه ماضاع
حل القضيه ياولد علها تهون=ماتحتمل يالصاحب أنصاف وأرباع
والرجل ابه ميزه تثمن بمليون=ميزه تثمن بالذهب لو تنباع
ماقلت لغز(ن) يتعب اللي يحلون =هاذا الحميا يابدر مابها انزاع
وختامها ذكر الولي خالق الكون =مرسل رسوله للمخاليق شفاع