الإجابه نصها يايتيك من فهم السوالي=والسؤال اللي بقوله فسرّه والعلم قوده!!
كيف تترك ربعك الغالين وانت اكيد غالي؟؟=والزمان اللي يطش الناس يالله لا تعوده!!

ماغواني ماتقوله من خبر ياهملالي=والجمل شقران ماقيّد ولا حلت قيوده
ربعي الغالين عندي قدرهم في كل حالي=وانت منهم خابر ان البيت عزه من عموده

الجبل مايختلف هبّت صباء ولا عوالي=الجبل يثبت مكانه والبطل يثبت وجوده
لا تكب الشجره اللي تحتها تلقا الضلالي=شجرة الخير اثمرت واصل الثمر من طيب عوده!!

جوز من بعض الدعاوي ماوراها راس مالي=تعرف ان المتهم مظلوم لو كثروا شهوده
قصّر الدعوى ترى مالك لزومٍ فى الطوالي=قالها اللي فى اللوازم ما احدٍ ينكر جهوده

عد في راس المنيف اللي على الضلعان عالي=لا تحوّل جوف قبراً يسكن الدود بلحوده!!
والله انا مانذمّك من كريمين السبالي=والبخيل يبين بخله والكريم يبين جوده!!

ما انت داري وش بقالك ما انت داري وش بقالي؟=والزمان اليوم تدري تختلط بيضه وسوده
انت ياكبتن مناحي مثل ابو زيد الهلالي= انت صاحي مير غيرك ياكثر ناسٍ رقوده