الشعر موقف وأكثر العمر وقفات=ومن لاتجمل به وطته الملامه
اما رقابه فوق روس الطويلات= ولا حدر به مثل فرخ الحمامه
سلاح ذو حدين في كل الأوقات = ان مارفع رقده يقل احترامه
مكيال في كف العقول الرزينات = وكل ٍ على ماقيل وزنه كلامه
ومن لاحبك معناه في عرض الأبيات = اخير من ذكر الهزيل انعدامه
وانا قصيدي لاغزا الفكر بسكات = أرخى هماليله سوات الغمامه
يشدني له شي في داخل الذات = وان صرت ما مسيه اصبح امامه
ديموم شعري لو نزل با السروات = حول على الساحل واغرق تهامه
ارفع مقامه عن طمان الهزيلات = والبّسـه ثوب الشرف والفخامه
رقيت به اعلى الجبال المنيفات = وبنيت قصر ٍ مثل قصر اليمامه
ونقيت من بكر البيوت الجزيلات = واخذت من فحل المعاني سنامه
واقيم ابعاده بكل القياسات = وافرش على دربه من الزل خامه
يا الله تجملني بها الوقت با الذات = فا الموقف الي زايد ٍ احتدامه
في حق ربعي ياجزيل الشعر هات = هات النوادر واترك الها علامه
قوم ٍ لهم في صرح الامجاد رايات = ولبسوا لباس الطيب لبس العمامه
ليا ارتفع هامات من فوق هامات = احس باني اطول الخلق قامه
زدنا على هقوات الابطال هقوات = حتى غدينا بشاهق العز هامه
عتبان يوم ان الليالي عسيرات = عدونا مايهتني في منامه
صغيرنا ماينفطم با الملذات = على الشجاعه والشهامه فطامه
وكبيرنا يسعى لمرامه بهمات = لو هو ورا سهيل اليماني مرامه
وخوينا يامن من الخوف مابات = وياسعد منهو با الملاقا حزامه
ويديننا من المكارم نديات = تجود ماجاد (الذويبي) بطعامه
حنا سيوف الدين وقت المهمات = اليا اشتبه بين الحلال وحرامه
ماننحني للوقت وصدوف الازمات = نزود لازادت علينا صرامه
تاريخ غز ٍممتلي با البطولات = من قبل ابو زيد الهلالي.. سلامه
ابا افتخر وانثر من الشعر باقات = ومع كل بيت ٍ اذكره ابتسامه
ومن لامني او شك في كل مافات = يدس راسه با الثرى كا النعامه
وتبقى القبايل شامخات ٍ عزيزات = وكلن لحقه خابرن اقتسامه
والله يعز ملوكنا والقيادات = هم فخر لشعب السعودي وسامه
اهل الكرم واهل العدل والمساوات = في حكمهم عاش الجميع بكرامه
وختامها عدد نجوم المجرات = وعد انبلاج النور عقب الجهامه
صلو على المختار بازكى الصلوات = شفيع كل الخلق يوم القيامه