الجو بارد والسماء كلها غيم =ونور القمر محجوب والليل حالك
صارن مغاتير الليالي مجاهيم = رحماك يالمعبود جلاّ جلالك
قامت تلاشا بالزحول الملازيم = كم واحد ٍ في كلمته ماوفالك
الهم ياكثره ويا ما اكثر الضيم = والمشتحن ضاقت عليه المسالك
كم واحد ٍ صارن اهمومه مراديم = ويقول انا من بدت الناس هالك
ياللي تقول الهم في قلبك امقيم = اقول ما انت بهالمشاكل لحالك
غيرك وغيرك فيه ناس ٍ مهاميم= معروف هذا شي حطّه ببالك
الغيب يبدي بالليال المقاديم = واللي كتب لك في جبينك ينالك ينالك
اصبر على ماجاك واعمل بتصميم = وعن الطويله لاتقصّر احبالك
ان كنت نايم يكفي النوم يانيم = صحصح عسى واليك يلطف بحالك
معروف هالدنيا حظوظ ومقاسيم = واللي كتب لك بالمقاسيم جالك
امع العزايم يحصلن المغانيم = وعلى سوى الله لا تحط اتكالك
تاخذ نصيبك والعمل بالخواتيم = واللي يحسدك ما نقص من حلالك
تبغى النجاح اتبع صحيح التعاليم = يمكن تحقق مابقي من امالك
حل الصعايب با اتفاق المفاهيم = ماهوب شي اتقرّره من خيالك
هذا كلام الصدق من غير تعتيم = وبلا يمينك ماتصفق شمالك