[quote]ياالله يامنشي المطر من سحابه = يامنشي غر السحاب بماه
يامنشي الماء فالمزون الغوادي = تلعب به الأرياح في منشاه
يامجري الافـلاك حـتى مـقرها = ترتيب كل عارف مجراه
يارازق الحيتان في غبة البحر = حاشا كرم جود الغني ينساه
تفرج لعين حارب النوم نونها = كن الكرى عنها طويت رشاه
وقلب حداه الوقت من دون غايته = ساهر قمر عشرين في مبداه
وياقيل من جرب حلاها ومرها = وضيم الليالي ما يرع ثناه
لكن اماشي الوقت في اللين والقسا = ومر ٍ يحاديني ومر احداه
ومن لايداري هجرته باح سده = عميت دروبه واللزوم إحذاه
ضده زمانه لين يبحث سدوده = وامسى كما ذيب يجر عواه
وانا الذي من تجربتها عرفتها = وكل عرفت بناه في مبناه
وليا بنيت قصور ترجع سقايف = وعلى كذا بيع الزمن واشراه
ويا متعب اسمع من مجرب نصيحه = من عاقل ٍ مايختلف معناه
حلس القبيله ياحذارى تناسبة = خله يناسب واحد ٍ شرواه
وابعد عنه قدام لاتبتلي به = وليا بليت احرص على فرقاه
مقارب الانذال كله خساره = والبيع بالخسران من يرضاه
خسارة ٍ فالحال والمال والذرا = ومعلوم طلع العود من مجناه
من قارب الجربا كما قيل يجرب = ومن حل في وادي الهيام اعداه
ومن لا يصون العرض عن منسب الردى = شاف الندم في ما جنت يمناه
ليا جهلت الارض سايل هل النظر = ويجيك من عند اللبيب وصاه
من قارب اجواد العرب يسلم النشب = يصون عرضه ما يباح حماه
يرفون خلاته ويدرون خاطره = وبيته يعلونه على علياه
وليا نبابه منزله ثم زارهم = عاضوه في اقرابه وفي مشحاه
ولو كان زلاته كبار الزرايب = ما احد درى عنها ولا ناحاه
ومن لا يشيرك لاتشقوى بحاله = لو كان سرعات الندب تاطاه
كم جاهل رايك يشوفه جهاله = وليا نصحته راح في عمياه
ولا كل من يضحك معك تعتزيى به = يغرك الربريب عند حكاه
وتصبح تبيع من الهقاوي بلا ثمن = في سوق خالي قول واعزاه
ليت الرجال وسومها في خشومها = حتى ليا شفت الردي تـنفاه
لكن اوادم كاسيتها ثيابها = والستر من رب العباد اضفاه
تمت وصلى الله على منبع الهدى = نبينا اللي نهتدي بهداه
عداد ماتذري الصبا والعوالي = واعداد ماهل الخيال بماه