الهاجس اللي عن هل الذود مذخور=منقيّة إبن فهيد باحت كنينه
ذودٍ تغيض صدور و تفرّح صدور =و تريّض العجلان و تسرّ عينه
إن ساقها ابن فهيد مع طلعة النور= كنــّه يسوق الرعب لمنافسينه
أقوى من الشعّار لن قام مستور = لا صار يبغى اللعب و مزعّلينه
يطلع لها من كلّ جمهور جمهور = متابعين الزين و مدوّرينه
ملك الشيوخ اللي لهم فالقسا دور = ماهو بـ شيً توّهم بادعينه
حامينها يوم أحمر الدم منثور = ما روّحت عند الأعادي رهينة
قدايمٍ تبقى ليا نفخة الصور = يمدّها التاريخ لمورّخينه
شجرة لها تاريخ وفروع وجذور = ومنها طلال الله يطوّل سنينه
شيخٍ ولد شيخٍ مكانه على الكور=متوارثين العز و مورّثينه
بيتٍ على الطالة مشيّد ومعمور = حصنٍ حصين من الحصون الحصينة
فيه الكرم والشور لمدوّر الشور = والعون للي ما لقى من يعينه
من لاذ به ما يعرف الضيم والجور = يموت ما مرّت عليه الغبينه
واللي يجيه من الزعل دمّه يفور = يروح نازلةٍ عليه السكينه
يا راعي الطالة مجمّل ومشكور =فعلك ينومس والعرب خابرينه
اعتزّ بك وقصور ماحولك قصور = بعد السما والارض بينك وبينه
يا جدي الطّيب و يا بوي مشهور = يا سعد والله من يحطّك يمينه