يا صاحبي لا هنت دوك الدركسون=سق موتر اللي طالبٍ منك حاجة
طالبك لا تسرع .. وخلك على الهون=(حملات يكفي) ما تحب السذاجة !
حطو لك الريجيل رادار ملعون=يلقط عريب الجد ولا الخواجة
وانا رفيقك لا تقدمت مجنون=لا منهج القانون ولا انتهاجة
واكلتها ثنتين واطبقت طبلون=ثبّتني الملعون يوم انتواجة
يا نكبة الرجال لا صار مسجون=ما عاد يومر فوق شعرة حجاجة
لا تضحك امن الهرج والعلم مضمون=شوف اعتدال الدرب وشوف انعواجة
وان كان ودك تنطلق داخل الكون=روح انطلق .. والجرح تلقى علاجة
لو زاد همك هم .. منته بمفتون=وان زاد همي هم زان اندماجة
هم الغرام .. ونغمة الواو والنون=واحساس عاشق ضايعٍ في عجاجة
وفعول معشوقي ليا قيل يوذون ؟=يوذون ما به شك مثل الزجاجة !
والشوق .. والمشتاق .. واصحاب العيون=والنار جعل النار ماهي وهّاجة
الهم زاد وصار طاحن ومطحون=فالمدخل اللي ما تعيّن خراجة
بيّحت سد ٍ بالغرابيل مكنون=ناجاك ابن بادي .. ولكن ناجة
قلي .. علام الهم له ناب وسنون؟=والحظ الابيض صار ياخوك صاجة ؟
اقول لك شيٍ .. وتتركه مدفون ؟=اسحب على القانون واخذ الدواجة !