الفكرمن كثر الهواجيس مشغول = والقلب كبرت حيرته من طواريه
همٍ تولجني هذا داير الحول = عكر مزاج النفس والحال باريه
صبرت مار الصبر له حد معقول = واليوم مافي داخل النفس ابا ابديه
واشرح لعراف العرب صايب القول = حملٍ من العام ارهقتني بلاويه
وانا على دربي وقف ناسٍ خبول = وصديت عنهم ما بغيت المشاريه
مار ابتلاني بالحكي كل دعبول = اهل الوجيه المظلمات المكاريه
ناسٍ زغرها ابليس واعقولها طبول = تركض ورا هرج القفى ماتخليه
كم واحد سيفه على الخلق مسلول = يشذب عراقيب المقفي ويذيه
خبلٍ بعد ما متس كرشه من الفول = ولع قديحتها وشوش باذانيه
زيف على الغياب اقاويل وفعول = كذبه بحلفه مقترن به يباريه
حلوٍ لسانه باللقاء مار معلول = معلول قلب الله يغثه ويخزيه
يخوض فالمجلس بلا عرف ووصول = ويصجه بكثرت رياه وعزاويه
عن هرجته سمعي مسكر ومقفول = مار البلاء ناسٍ تسمع دواديه
وما للنصيحة في عمى القلب مفعول = لا جيت له نصاح كبر علابيه
ومادام مالي فيه قوة ولا حول = ابا اتركه يلقى سفيها يناحيه
لا صار وضعي معه ماهوب محلول = اجل وش اللي من هك الزول راجيه
ماني مكلف عن صلاحه ومسئول = لابد ما يندم ويأسف لماضيه
وألا على عمياه يبقى على طول = من لا هداه الله ماني بهاديه
عن ديرته تبعد بي اخطاي واقول = لاخير في دارٍ كثيرة نوانيه
ممشاي مع خدٍ من الوسم مسيول = اخير من قربه وشوفه وطاريه

بندر العتيبي

المشاركة الأصلية كتبت بواسطة ماله امان (المشاركة 337297) الاخ التــــــــحدي صح لسانك جزله من جزل سجل اعجابي واحترامي لك ،،،،،