أول كلامي لا اله إلا الله = فرد صمد هو ربنا المعبود
واللي بعدها ياصلاتي على النبي=شفيعنا فالماقف المشـهود
عليه أصلي كل ماحل طاري=عداد ماتذري هبوب النود
حنا عتيبة من على أول جدودنا=الحي واللي في كفن ولحـود
عسكر هل العوجاء معدلة العوج= نمشي القوايل والليالي السود
تحت علمهم مرخصين أرواحنا =ونرمي بها في شعلة البارود
عيالهم خدامهم في لزومهم =حتى رضيع(ن) في المهد ممهود
عيال عود عقب النصر كله =عقب عيال فاللزوم فهود
الله يثبتهم على الطالع العلا=رغم عن الحقاد والحسود
وحنا بأمان الله ثم أمانهم=نرقى سنود وكل يوم بزود
محصنين المملكة عن عداهـا=لين أصبحت فوق الحدود حدود
في محفل الهيلا نويت ابتدي=وأقول مايلحقني المنقود
ما نفرق الروقي عن البرقاوي=الجد واحد والجميع اوسود
فكاكه البـل من جميع عداها =يوم(ن)ذا طارد وذا مطرود
خشم المعادي دونها يفركونه =كحل الدجاء وسط العيون السود
كبارها ترعى الخطر ونحماها = واللي بغاها ما أدرك المقصود
من دونها الهيلا تغني وتعتزي = ومن دونها نجرح متين كبود
لطامـة العائل وهـذا لقبهم =وعشى الضيوف الحق والمفرود
ونكرم لحاهم بالشحم وزيادة =بالهيل والبن الخضر والعود
قصرت وأقول اسمحوا واعذروني=وارجع لربع(ن)فعلهم مشهود
الاد عاضي عزوتي وأفتخر بها=لطامة العائل عن المضهود
اتزبن الجاني وتدفي جنوبه=وتشب نار من شرار زنود
عمهوج سيف شيوخنا نعتزي به =شيوخ مزحم والليال سعود
ربع(ن) يفكون العطف من أعداها =في ساعة يذهل بها المولود
وكـل القبائل يشــهدون لفعلنا=غصب عن النمام والنمرود
شرابه الفنجال نثبت كلامنا=الليل نسهر والعباد رقود
بالسيف والشلفا اكتسبنا عدونا=جينا براسه والخبر ماكود
تنشر لنا البيضاء على كل عالي=وحبل الشرف لشيوخنا ممدود
فوق الدفينة ويش سوى مسلط =رد العضيباء والعدو ملهود
يلوفهم مثل العقاب الصارم=مع صمد معتق وانكفوا عرجود
وجوه المحايا كل واحد يعتزي=ماهي بفزعة باردين خدود
السيف يضرب في جماجم روسهم=والرمح والشلفا مع العبرود
ومن بعدها نرجع لفعل شيوخنا=شيوخ(ن) تحلحل مبهمات عقود
عيال شالح مع عيال محصن=وابا العلا وشديد العبود
وزريب وبن حميد معهم ربعهم=رفرف علمهم فوق رأس العود
هو قائد الهيلا منزحت العدا=عساك ترحم يا هذاك العود
دون العشائر يلطمون أعداها=يوم النهيلي مثل صوت رعود
واللي من اول دون نجد يغني=خلوه لا ناشد ولا منشود
نزحته الهيلا ورا حصاته =وريعه عليهم مقفل مسدود
وحنا بني ثعلي قضاة الروقه= حياظ روق وحاظنا مارود
قضوه واماره من على اول جدودنا= واهل النقا في جارنا المعمود
وكل القبائل ماهضمنا حقهم =يستاهلون وحقهم ماجود
واليوم مابه تفرقه في القبائل = والفضل لله ثم لآل سعود
وعسى ملوك أمنونا بعدلهم= ياجعلهم وسط النعيم خلود
واختم كلامي آخره مثل أوله = لذكر النبي الهاشمي نعود