مسيت بالخيرات يا شاعر ثبيت المنتظر = لعل قوم ثبيت فيكم ما تخيب ضنونها
من عقب ما خذت الشهاده من مدير ٍ معتبر = هقوات ربعك يالثبيتي لا تجي من دونها

مسيت بالنور الذي يفلجك يالليل الغدر = واثبيت من قبلي ومن بعدي تعج اغصونها
اليا بدانا الريع ماجينا ودورنا عذر = ناصل وجيه القوم وانذر الكحل فعيونها

انته علامك يا طويل العمر ,, كنّك منتحر !! = وش فيك تاقف للذباب اللي تحد سنونها !!
لا بد تاخذ يا طويل العمر فالوقت الحذر = قدام نفسك يالثبيتي لا تزيد غبونها

دام النتيجه سجلت من صالحي ( 1 - 0 ) = ابتكي في فيه اقصور البلد واحصونها
الله يجملها بخير وكلها شغلة شهر = وانعرف صاحيها على ماقيل من مجنونها

جعلك يبن سرحان دايم وانت في فيّة قصر = وجعل القصور اللي تذرّي ما تهز ّ اركونها !!
بعض العرب يقطف زهر ,, والبعض ينحت في صخر = وأم القرون الشقر يا فايز تكدّ اقرونها

بعض العلوم اللي سمعناها لها بطن وظهر = وام الكباير سالمه مابيحت مكنونها
وشلون .. لو علمتك بشي ٍ على بالي خطر = واخاف شرهة ربعي الادنين لو يوحونها

كلمتك هذي قلتها من خوف ولآ من سطر = وأم الكباير ويش دست عنك في ما عونها !!
الكلمه اللي يا ولد سرحان تاقف فالنحر = يموت صاحبها ليا منّه جهل مضمونها