ياسلام الله سلام الود والتقدير كله = يابن برقا والسوالف بيننا سكر زياده
عن لهيب القيض قالوا لي على راسك مظله = والشكر موصول للاصحاب المعالي والسعاده

مرحبا في مرحبا واقلط على فنجال دله=بعدها نسمع علومك والله الله بالركاده
الهبايب تصطفق وطويق ثابت في محله=وانت خلك في شعاع النور جنب عن سواده

البقا ياللي ترحب والمشاعر مسفهله = مير لايصبح نظر عينك كما عين الجراده
يوم مقعد غاب قلنا الحكم يصدر فالمجله = واثر مقعد طال عمره من بلاده في بلاده

انت عندك مشكله والعقد ماتقدر تحله=كل ماشبيت نارك عودت نارك رماده
الله اكبر ياهلالٍ مادرت عنه الاهله=لو درت عنه الاهله يمكن يحقق مراده

المخيله خيّلت مير المطر عيت تهله = كيف ترضا الظلم والرحمن مايظلم عباده
عزّت ابراهيم ليذالحين مارجل ٍ وصلّه = والخلل من مكتب السري ومن راع القياده

ابن وايل في سجلّه وش لقو داخل سجله=الافاده طيبه وابشر على حسب الافاده
عزت ابراهيم عايش بالخيانه والمذله=وانت جاره مشترك ياعقاب في ملحه وزاده

ابن وايل ياخوي الجنب كل درب ٍ يدله = ان ضريتوا للسنع ولا ّ على درب القراده
ان هرجنا فالخيانه علتّك فالوقت علّه = وش حصل هاك السنه وشعيل ماحوِّل شداده

الشمالي في شماله والتطور ماحصله=والجهل ياعقاب من ماض الليالي فيك عاده
ابك حنا من قديم الوقت دوله مستقله=وانت وضعك ماجهلته لو تزور لك شهاده