بسم الله الرحمن الرحيم


هذه القصيدة كتبتها في رثاء اختي التي توفيت اثر حادث مروري في تاريخ28/7/1426هـ سائلين
المولى تبارك وتعالى ان يتغمدها بواسع رحمته,, وان لا يريكم أي مكروه


لاتحرموها من دعاءكم,,
دمتم بحفظ الله سالمين

مرثية ام بندر

ياعين هلي دمعتك لين تقضين=الدمع في بعض المواقف شهامه
ياعين كنتي بالوعد دوم توفين=ودرب الوفا دايم لطبعك علامه
ابكي على اختي(بنت متروك) ياعين=وصافي دموعك سارعي بـاغتنامه
ياعين اخوها ذاق مر العذابين=من حر فرقاها تكدر منامه
دمعك حرمني شوفها كان تدرين=ولاني بشايفها ليوم القيامه
عاى مشارف قبرها يوم تبكين=يوم الكفن والحنط فكو حزامه
الدمع غطى ناظرك ماتشوفين=من دونها غطاك مثل الغمامه
سوي على كيفك مثل ماتسوين=مايلحقك باغلى خواتي ملامه
السبت في تاريخ تسعه وعشرين=اخر رجب سته وعشرين عامه
جاني خبر قال امس بين الصلاتين=عصيرقبل الليل يوفي ظلامه
حصل تصادم والجماعة سليمين=الا(ام بندر)ماكتب له سلامه
بغى يتوقف خافقي والشرايين=والجسم عيت لاتشيله عظامه
تدفن صلاة الظهر والظهرهالحين=ومشيت قبل انه يخلص كلامه
ساعه وساعه باقيه ماتكفين = قل للمؤذن ينتظر فالاقامه
وصلت مع لحظة خروج المصلين = والدرب باهل الخير زاد ازدحامه
الناس واغلبهم من الربع الادنين= اللي يسلم منتبهت لسلامه
ولحظة وصول الغاليه بين غالين = ياحي جسم(ن) خف ريش النعامه
الله يوسع فالقبر لين ترضين = بامر العزيز اللي رفيع(ن)مقامه
وفي جنة الرحمن في دارعلين = تسكن مع اهل الحسن والاستقامه
بين القطوف الدانيه والرياحين = وانهار من حولك وريح الخزامه
يشهد لها ربي والاقصى والادنين = وكل القرايب من خوال وعمامه
ارضيتي الله والبشرعنك راضين = يلي رحيلك يوم جمعه ختامه
جريح يا(مساعد)وانا في جرحين = واللي يلومك يستحق الملامه
تبغى العزا مني وانا من يعزين = كني رضيع(ن)عند حزة فطامه
قال المثل ماحد(ن)يوص الحريصين = اوصيك لين البدر يكمل تمامه
قل للصغيره للجرس لاتروحين = الناس فيها يامساعد غشامه
من خوف لاتسئل يقال امها وين = يعنى بمعنى مختصر(وين مامه)
لافيه من يسئل ولا الناس دارين = والهم يسري فالضلوع اللتهامه
لجة ضلوعي لاذكرت الصغارين = من لابس الشيله وراعي العمامه
قل للولد تكفى وللبنت تكفين = ممكن يعوض يتمها بابتسامة
لاشك انا مايكتب الله يرضين = وحلو الكراء ماظنى اقدر انامه
الضيف يكرم في ديار الكريمين = وكرامة الله مابعدها كرامه

شعر/عبدالرحمن العقيلي

المشاركة الأصلية كتبت بواسطة ابن غزاي الخظري (المشاركة 1041776) الله يرحم ام بندر واموات المسلمين اجمعين اخوي عبدالرحمن الله لا يوريكم مكروه باذن الله وصح السانك وغفر الله لمواتكم

المشاركة الأصلية كتبت بواسطة الحميدي العتيبي (المشاركة 1041781) الله يسكنها الجنه ويرحمها ويجبر مصابكم ...ويرحمنا اذا صرنا ما صارت اليه

المشاركة الأصلية كتبت بواسطة رايد الهديبي (المشاركة 1041793) الله يرحمه برحمته ويسكنه فسيح جناته وصح لسانك قصيده في الصميم بصراحه وحزينه جدآ

المشاركة الأصلية كتبت بواسطة النشمي (المشاركة 1041899) الله يرحمها برحمته ويسكنها فسيح جناته