خبريني ياهبايب وشهي اخبار الحبايب=قاطعين الوصل عنا لا اتصال ولارساله
وين مرزوق العتيبي مات ولا وين غايب؟= هقوتي لوكان حيٍ ماقطع عنّا اتصاله
حسبي المولى على مرزوق من عرض الحسايب= هو رفيقى من قديم وخابره شلّي جراله
ما انتسي عن صاحبي لو ركزوا فوقه نصايب=وهونساني مالي الا كم شهر هو وش طراله
الصداقه ماتدوم ان كان داخلها شوايب= ماندّور منه مال وبارك الله له حلاله
والصداقه يالعتيبي ماتكوّن بالغصايب= من رخص عنده صديقه جعل مايرخص رياله
والهنوف اللي تنقض شعرها فوق الترايب= جعلها عنه تشوم ولا ترومه باي حاله
من قديم الوقت يوم ان الزمن سلب ونهايب= كل من له صاحبٍ لوّه من القوم ايعناله
ذاعتابي يالعتيبي منه انا مانيب تايب= وانت من ناس يحبون الشجاعه والشكاله
خوة الطيب تجارة عز في وجه النوايب= قبل لاتنشد عن الرجال انشد عن خواله

مرحبا فاابيات شعرٍ تحمل امزوح وعتايب=من صديق ٍ لو يطول الوقت ماادوّر بداله
مرحبا فيها عدد ماحنت ارعود السحايب= اوعدد مالاح براق الحياء وامـــطر خياله
ابشر اني حي في وسط الزمان ابو العجايب = يغفل الرجال فيه ويبعده زودانشغاله
كل رجلٍ له ضروفه كل شيٍ له سبايب=قبل ماتعتب على الرجال طالع وش حواله
يوم عبدالله يعاتب ما اجمل اعتاب الصحايب=يتهمني بالقصور وين ماشفنا وصاله!!!!
ليه ماسيّر وانا وياه بالحاره قرايب؟= ماتكلفه الزياره كان يطمع فالجماله
والله انه من رجالٍ فعلهم يوم الحرايب=يزعل العدوان .. لكن مايحبون العياله
الكلام اللي بعث به والتشره والطلايب =ناتج ٍعن حبه لشخصي ومن طيّب خصاله
والصداقه ماتغيّر مع رياجيل الصلايب=والصديق المحترم يبقى السعد والخير فاله
والوفا من طبع اهلناوالكرم فينا وهايب=حافظين المرجله ونقوم بحقوق الزمــــااله