ماعاد فيها سلام ولا ســــــــلامه والله المستعان =من عقب ضاعت بضاعة ضيفكم بين الجبل والشعيب
الطيب اللي يمثــــل عزوته ويســــد في كل شان=يقوم ويخلــــــــي شهوده ليا جات الدعاوي قريب

مادام مانت بسلم مالك الا السيف عطب السنان = ياللي تطشم تمهل لاتشيّب قبل حل المشيب
رجالنا ياوسيع المعرفه يثبت لاشان الزمان = واللي يعاند يبا حظه بعد عاك المعاند يخيب

لا وا حلا لاه ياهل المعرفه واهل الوفا والبيان=اللي لهم حظ في علم النجوم ويفهمون الخطيب
اما اعرف السالفه واخذ المعاني من فصيح اللسان=والا اترك الحمل كان انه على شرواك حملً صعيب

اللي يبا الطيبه يتعب لها ويطب سوق السمان = والناس نحكم علاها من لغاها وافتهم يالبيب
انته تقلب بهرجك والنوايا كنك العقربان = لاوالله الا لها وانا من اللي يلطمون الحريب

مدام عندك طموح انك توقف في محل الحصان=هاك القضيه وعاينها وعطني حلها يالاديب
السلعة اللي عليها من وكالتهـا ختـوم وضمان=وشلون يقعـد لها الجمرك ويلحقها مقص الرقيب

اقف مواقيف فرسان الوغا مانيب مثل الجبان = والعلم وصلك على وضح النقا مافيه شكه وريب
شفت القضيه وغلطة صاحبك كالشمس قدم العيان = وانته تشوف الخطا وتجامله ومجامل الناس عيب

الضيف ماله ذنوب ومن رجالً ما تحب الهوان=والجرح يحتاج نظرة عارفه راكد ومشرط طبيب
لومك على اللي يحول بالمطية في طريق الطمان= والا الزناتي عليه اخطيت يا ابو زيد والله حسيب

الضيف له واجبه مدبول ماينقص لقدره مكان = وانته وانا لاوردنا ناصل الجمه بجوف القليب
اليا صحبت اصحب الطيب على الماجوب عنده ضمان = ولا الردي لاعرض لك يالسنافي حط فوقه صليب

وشلون اجل ما حفظتوا واجب اللي يكسبون الرهان=لا ترقعون الخطا البين على العالم بحبة زبيب
ان كان تعطون حق وتعرفون الداين من المدان=تبصروا فالحقوق وللعرب قوموا بحلً مصيب