الابل غلاها داخل القلب يادحيم=والمخطي اللي مايثمن عطاها
احبها واحبها حب واهيم= ومن حبها ماسمع لشخصٍ شناها
حب ٍ حقيقي مادخل فيه ترهيم= من مبتداء دنياي لآ منتهاها
يكفيك فالقران ذكرت بتعظيم= في شكلها في صبرها في عناها
سبحان خالقها بحسن التصاميم= ربٍ خلق خلقه وحكٌم بناها
هاذي عطايا الله علي الملازيم= لو شانت الايام يبقى غلاها
سفن الصحاري رمزنا والتعاليم=ياعل مخطين المراجل فداها
واخص وضحٍ فالوطا كنها الغيم= مثل المزون الي تغطي سماها
بيض المزون المكرمات المراديم= لاهٌل وابلها كريمٍ عطاها
ولا كما خيام الملك داخل خريم= في روضةٍ ريح الخزاما زهاها
بنات هرشٍ مادخل ساحة القيم= خطو اوضحٍ زين الوصايف حواها
والطبع فارق مايبا زود تفهيم=من ساس وضحٍ عاليٍ مستواها
حاميه ابن شقران مايلحقه ضيم= ومن مد نصف الكف ياخذ ملاها
سلطان ابو نايف سليل الصواريم= الي نقاها نقوةٍ واحتماها
ماردٌها في مزرعة خبة الريم=ترعا الديار الي وسيعٍ مداها
وضحٍ على ماقيل زينت خراطيم= ياسعد عين الي بماله شراها
دق الرقاب الشامخات المزاميم= مثل السيوف المشهره من خباها
فجحٍ سناد اطوال ماهن مقاميم=جل الظهور الي تفاهق وراها
خرع الاذاني مالحقهن تقاديم=سند الغوارب بالوصايف تباها
هاذي تراها منوتي يالشغاميم= وضح البكار الي عجالٍ خطاها
شفي مع المغتر نهار التعازيم= لالبٌد الراعي وصوتي شعاها
مرباع ولا صيف دايم مواليم= ماحتار في دارٍ بعيدٍ حراها
سجيت معها مالحقني تظاليم= ينزاح همي يوم نتبع هواها
اعيش عمري بين شداد ومقيم= عن زحمة الديره وضيقت فضاها

المشاركة الأصلية كتبت بواسطة متعب العصيمي (المشاركة 331299) بنات هرشٍ مادخل ساحة القيـم خطو اوضحٍ زين الوصايف حواها البل طرب .. وصح لسانك وبيض الله وجهك.. .. موودتي..

المشاركة الأصلية كتبت بواسطة ماجد الرويس (المشاركة 333019) يانايف كفيت ووفيت ولاحًد بلايمك صح لسانك يارع الوضح ابدعت تحياتي

المشاركة الأصلية كتبت بواسطة أبو نجر النفيعي (المشاركة 333207) .. ابــــداع منقطع النظير :) صح لسانك يا مبدع .. ودمت للابداع .. . وننتظر جديدك

المشاركة الأصلية كتبت بواسطة ابراهيم الزراقي (المشاركة 333343) صح لسانك وتسلم يالذيب ومايحتاج هذي الابل عطايا الله

المشاركة الأصلية كتبت بواسطة سفير النفعه (المشاركة 334144) صح إلسانك وعلي قولت أخوي أبو نجر المثقف ( إبداع منقطع النظير ) وهذي عطايا الله لها حق علانا من الشعر

المشاركة الأصلية كتبت بواسطة نواف العصيمي (المشاركة 335048) صح لسانك .. ,, جزل ولاهنت على الإبداع .. ولك التقدير والإحترام