يقول من بعض الامور حداه = على القيل باسباب يطول مداه
لو اذكر الاسباب طولت شرحها= أو زادها هذا لذاك رواه
ما اعد نفسي شاعر مع هل العدد= احفظ مثل وافهم بعض معناه
ما قلتها وافد ولا هي تغزل =ولا اعيل والمخطي نعد خطاه
والقيل به واضح وغامض ومشتبه = معنى المثل في بطن من سواه
أرى كل شاعر قوم يمدح قبيلته = أيضاً يصادم بالجواب عداه
وانا من الهيلا هل الفعل والظفر= لو عد عشر افعالهم كفاه
تشهد لهم ساكنة البر والبحر = ومعارك غطا الجبال سناه
من أولاد روق اللي عريبٍ ساسهم = وبرقا وهم جسم كمل بأعضاء
هيلا تهايل بالفعايل والعداد = برقا وروق من أوله لا تلاه
ولزمهم بالجار والوجه والخوي= ومن له لزم من الجميع أداه
سكنا رهاط وبه تركنا غروسنا = رهاط المسمى بالحجاز رباه
اساعدة جينا مع أولاد عمنا = احفاة وسميري وما والاه
تفرقوا في نجد حضر وبادية =وكثيرهم بأرض العراق نصاه
اساعدة بأرض الحويقة وغيرها = خذوها بفعل ما عطوا مداه
ومسامير منا أهل عنان وفرس= مع الظفير مدلهة من جاه
لوهم قريب نفتخر بافعالهم =لا شك في بعد الوطن مجفاة
بعضهم بنجد بداة تشهر فعولهم = سميري عددهم واسعدي واحفاة
عددهم قليل وبينتهم فعولهم = معارك تسجل والنشيد أحياه
لقوة مسيمير وشمر وغيرهن = والصدق تشهد به كثير عداه
اساعدة يا سعد منهم ربعه =اقطع من الهندي بحد سناه
جنوبنا الزلفي شهير مع الملا= واللي يعاندهم يضيع جداه
فروع عربان وصاروا قبيلة = وسما ذكرهم حتى العدا تدراه
من يعتزي بجريس في كل ديرة = من كثرهم يصعب علي احصاه
منهم من السلمان جو في عنيزة = هم والذكير بشهرة تزهاه
أيضاً حمد وحمود وهم الشايع = وملحم مع الراشد فعول وجاه
جو بالكويت وسجلوا به طايل = يستاهل النوماس من شراه
اللي يريد الطيب دربه واضح = واهل الردى عسر لهم مرقاه
وبني عمنا الفوزان جو في بريدة =هم والرشود وجا من زعماه
ضحيان والقناص هم والصقري = كل لما قدم ينال جزاه
انشد وتلقى الاسعدي فوق ذكرهم = مع اولاد علي مدمرة لعداه
ومنا سكن بقعا هي أول بلادنا = بنوا بها مجد وطال بناه
يا كثر مع زايد كرمهم شجاعة = مواريث جد من ولاه بناه
ومنا القعيد والمويشير قد ربوا =مع لابة مدح العرب يزهاه
هل الجوف اهل فعل وجو من خيارهم = ورجا المشتهر ما احد ينول حماه
سطا على المنصوب ماهاب قوته = غيرة مواطن والسطار حداه
والاسياح كله ما انسل الجد صالح = وراشد بظني هو كبير ضناه
نزل بعلقة من عقب سكنا المجمعة = وأكبر عياله رحل وابداه
مع الطوالة قيل عشر يزيدن = سنين وهم في قصرة ما احلاه
تبادلوا بالطيب وأكبر ماقف = حصار الحريب اللي زموا بنحاه
هل الفعل والنوماس والطيب والصخا = عزوتهم الهدلا يزاد ثناه
وعقب الطوالة قاصروا لابن نملة = على البرود ومنه تم شراه
واستكملوا باقي التنومة بالثمن = وزاد البلاد وساعفت دنياه
وتفرقوا منها بالاسياح كلها = باملاكهم كل تبع مشهاه
وصاروا مداهيل لركابة النضا = وشمخ ذكرهم حتى البحور عداه
وشمالنا ابا الدُّود زراعة الثنا = دنيا ودين والاله سقاه
بنو عمنا نفرح الى عد فعلهم = حنا وهم يمنى وذي يسراه
اما حنيظل به نوادر خوالد = واللي مدحهم مقتدي ما تاه
معهم من المطران وعنوز مثلهم = كل نقل حمله وزاد وراه
وبالاسياح من كل القبايل نزايع = فروع وحمايل فعلهم شفناه
سلوا عن بدايدهم وحنا نودهم = كل من الثاني يزيد غلاه
وبني عمنا بطريف غربي بلادنا = ريف لمن جوع المحول وطاه
بذارة المعروف حرابة الردى = في وقت من صاد الجراد شواه
ومنهم الخمشة اللي ربوا مع جدودنا = قالوا بنا مدح يلوح ضواه
راع الطيب نمشي له على قد طيبه = وراع الردى اللي مرخصه رداه
ايضاً الهجر معنا جهدهم وعدهم = منا وحنا ما وطوا ناطاه
مطير وعنوز ومن حرب لابة = يا وي قصرة جنسهم تشهاه
كل العموم أجناب واليا تقاربوا = غدوا مع بعضهم كاللبن مع ماه
أساعدة وسمه على الهجن حلقة = واللي خلطهم يا سمه برضاه
من روس واعيان أي دار ربوابها = سنان القنا مفهوم هو مبداه
أساعدة هذي موقع ديارهم =واللي نشد عن طيبهم يلقاه
شجعان كرمان يعزون جارهم = مداهيل ذا خاطر وذا يقفاه
اما فهيد ارث محمد واخوته = هم الفهيد ونفتخر باسماه
عبد العزيز اللي تومر عقبه = واخوه عبد الله مشا ممشاه
وبنيخيهم المنديل هم والعامر = وكل الجماعة ما وطوا تاطاه
حاموا على الديرة بعسره ويسرها = إلى اليوم ذا ما بدلوا سكناه
واما محمد عقب خونة ثويني = بلدهم وكهال الرجال افناه
نزح للعراق وعاد منها على الوطن = كما قيل كل عايد مرباه
وعطا العين له عبد العزيز المحمد = واللي حكم بعده عطوا بعطاه
بدا حفرها وأسس بناها على الصخا = بداها وحيد وساعده مولاه
بزروع وربوع يبالغ بكثرها =ورقيق يامرهم على مشهاه
شهد له مهلهل بالنشيد وغيره = سجل له التاريخ لين ملاه
وحبوه من عرفوه حضر وبادية = على كثر ما ينفق وزين نباه
وارث عياله اربعة مثل فعله = يني خي السبيلة ذا لذاك لداه
ومعهم بني خيهم ضنا عبد الله = الجد واحد والفعول اشباه
وعيال العيال اللي تورخ فعالهم = كل تحوش الطايلة يمناه
وتراوحت رسم الامارة بينهم = من صار منهم ما يحوش افناه
قنوا مماليك وجيش واصاليل = خيل عريب ساسها وغياه
مماليكهم ساووا بهم مثل نسلهم = وهم اخلصوا كن العمام أباه
قنوهم بحشمة واعقوهم بلا ثمن =كل على الرب الاله جزاه
وغزوا مع آل سعود بالمال والجهد = بجيش وخيل مركمين غذاه
وزكايا لبيت المال الوف مولفة = بدفاتر يقرا اوله واتلاه
وجهاد بنقود تساعد بوقتها = على الاصل واهل كدادته معفاة
ندافع مع آل سعود بالمال والجهد = والصدق يشهد له على طرياه
الصدق مثل النور ما ينتغطى = ما يقدر المغرض يفل غطاه
اللي يريد الصدق ينشد هل البخت = يعدون شي ما بعد قلناه
والناس كل له فعولٍ قديمة = وان عدها الهراج صدّقناه
واللي حداه القل والعسر يعذر = جود الفتى بالوجد من مولاه
واللي له افعال قديم يعدها = هل القرى كل يعرف اخاه
بالناس من حصّل جميلٍ على القصى = يوم أن الاكثر يكْهله عشاه
واليوم من فضل الولي كل اغتنى = الفرق بالحاجة على مبداه
ما تطلب الما وانت بالسيل ماشي = كل شرابه من تحت ما طاه
عسى الله يعز حكومة وفرت لنا = كل المعاني نشكر الاله
حق لها نخلص وندعي له البقا = والعروة الوثقى نشد عراه
ماني بحال اللي يعارض وينتقد = قصده نغر والا حداه هواه
أن كان هو كفو من الراس أقابله = بالصدق وان صح الغلط نمحاه
وان كان هولاش دوا اللاش تركه = ولاني مطول للطقاق عصاه
قبل الختام استغفر الله عن الزلل = رب كريم كلنا برجاه
والدين راس المال والعمر فاني = واللي عمل خير وشر لقاه
هذا وصلى الله على صفوة الملا = عداد ما هل السحاب بماه

المشاركة الأصلية كتبت بواسطة ابـــن الأجـواد (المشاركة 367150) هذا بدل ما تقول اشكركم يا لاد عمي يالاساعده :) .. على شاني انشر الملاحم والطلاسم لشيوخنا :mad: طيب طيب يا الوليد انا آسف :) .. اذا ما تكفي دور قاضي وحط معدااالك :cool: << آسعدي ما ينقرب ;) ..

المشاركة الأصلية كتبت بواسطة الوليد الاسعدي (المشاركة 367374) شفتوا وشلون اصبح الطالب مطلوب !!!! ماقول الا سمعا وطاعة واشكركم يا لاد عمي يالاساعده .