يامرحبا ياشجاع اغلى التراحيب=دوب استوى الليل والطرقة طويلة
انتم وحنا ترانا اهل المواجيب=قبيلةُ غالية واغلى قبيلة

دام البقا يارجال العز والطيب = واليا استوى القاف لازم نستوي له
ربعي وربعك عطيبين المضاريب = سم الكبود المريضه والعليله

الوقت دوار محدن يعلم الغيب=كم فارسُ طاح من فوق الاصيلة
ياذيب يااللي تجر الصوت ياذيب=بعض الذيابة ترا مافية حيلة

الوقت دوار والدنيا دواليب = كم راس لاجاه سيفٍ ينثني له
الصقر مايشبعه غير المخاليب= واللي ماهو صقر الا واعزتي له

يا صاحبي لاتغثرب في المشاريب=الوقت يخلص عميلُ من عميلة
يا سواط لوقمت تفتل في الاشانيب=ما انتة بويا العلوم المستحيلة

فالجال الاملس ماتلقا لك مقاضيب = ضيّعت وانا احسبك رجلٍ دليله
حنا رجالن نكمّل فالمطاليب = وش فيك خربتها يابو قذيله

الحمل جاير على عوج العراقيب=وانتة جمل مار ماتقدر تشيلة
نعمُ بكم مار ماجبتوا مكاسيب= حنا هل الاولة واهل الجميلة

في يدك شنطة مفاتيح وسكاريب = وتهرج عن الحمل واللي يرتكي له ؟
عمدان خيمه ولا حنا مناسيب = وكل ٍ من الناس ندري وش حصيله

الله حما نا من المنقود والعيب=واللي نبا ناخذة بهون وسيلة
خابرك مافيك عيب ولاعذاريب=لكن منتة بخيال الكحيلة

العلم يوخذ من كبار المناصيب = مايسندونه لبيّــاع البليله
ياللي تهندب وغرتك الهناديب = تراك منته زناد ولا فتيله