البارحة للوادي المعمور شديت الرحال= أصارع أحداث الزمن وتضدني واضدها
بديتها بالخطوة اللي لا حرام ولا حلال= الخطوة اللي بيّنت مزح العرب من جدها
وصلت للوادي مشخص بالعمامة والعقال= والعين مر اغضيبها لحضه ومر ألدها
وقفت هادي لو أنا طبعي سريع ألانفعال= وأقول لابد العلوم الطيبة لابدها
كم مرةٍ جيته وقام الحظ للعليا وقال= ترا البطا يثر على عروق الصبر ويقدها
وأخذت لي ساعة وعيني للجنوب وللشمال= وأقول وينك يالهنوف اللي كساني ودها
ابطيت لا ما ابطيت يا ربي عليك ألإتكال= ربي فرجها والدروب البيض ذعذع ندها
جني ثلاث من ذوات الحسن ربات الجمال= قلت السلام وقالن آمر قلت هذي عدها
قلت السلام وقالن آمر قلت ردي يا دلال= مرت ثلاث أشهور حاسبها ومحصي عدها
قالت هلا حييت يا لغالي لاكن الصبر طال= والكلمة اللي تستحي منها تفضل بدها
قلت ألليال البيض ماهي مثل باقيت ألليال= قالت وجيت تردها قلت ايه جيت اردها
ثم مدت اليمنى وقالت ( هيت لك) في كل حال= هذي يميني وانت يمناك الكريمه مدها
الليل وإجمعني حروف إجزال وإنثرني جزال= وإصرف ذهب وأنا ادري إنك يالقثامي قدها
هذي بنات أفكار نسج من الحقيقة والخيال= وألا الدروب العوج لأبوها ولأبو جدها
البارحة يا طول ليل البارحة يابو طلال= لأكن اخذ مني علوم وللنشاما ودها
في ذا الزمن ما للنشاما لا عمام ولا خوال= ألا مسلية الخواطر من مكاسب كدها
لن كان ما جيبك عمرته بالجنيه وبالريال= بيض السنون امواج بحر(ن) جزرها مع مدها
والضحكة الصفرا على فنجال من صفر الدلال= تسعين في آلميه وتسعه ما تعدا حدها
والقل ماهو عيب مير القل هو ذيب العيال= اللي تبا الناموس والطالة لأكن يردها
وأنا مضالي عام أمررها على كل احتمال= أجامل إخدوش الرجال اللي تبيّح سدها
لأكن مهما طالت الأيام مرجعها الزوال= مادامت سيوف المنايا كل يوم تحدها
لا بارك الله في ضروف الوقت وخدوش الرجال= أبني صروح ألمعرفه طيب ووفاء وتهدها