سميت باسم اللي له الخلق يرجون=في مبتدا قول(ن) منقيه بالحيل
باسم الله الجايد على اللي يجودون=رب(ن) كريم ولايبا كود تهليل
وسلام سلم إسلام بالحفظ والصون=على الحضور اللي لفونا مقابيل
ويامرحبا" فيكم وأهلا(ن) وتحيون=عن لابة(ن) ميقافها يضوي الليل
ويامرحبا فيكم عساكم تدومون=ترحيبة أهل الباديه بالهماليل
ويامرحبا مليون في دف مليون=باللي علشانه عزمنا الرياجيل
ترحيب في ترحيب بالعود مقرون=يامرحبا بسعود نسل المشاكيل
لو نذبح الذيدان لا مايكفون=ماتوفي بحق الرجال الحلاحيل
ويامرحبا بأهل الوفا يوم يأتون=عند المحل اللي كثير المداهيل
تسمع هلا مع مرحبا يوم يلفون=وقبل الكرامه ريحة الطيب والهيل
يامرحبا عداد ناس(ن) يحجون=وأيضا" عدد ماجرح الوادي السيل
وإعداد سجد مسلمين(ن) يصلون=يوم الصلاه كتاب مافيه تأجيل
وإعداد مال(ن) يدفعه من يزكون=على فقير(ن) ذايق الشر والويل
وإعداد من للفرض دايم يصومون=وإعداد من يبدع حسين التماثيل
وإعداد نور الصبح لانور الكون=للي معه يوم(ن) جديد المحاصيل
وإعداد ماض أيام وشهور وسنون=وإعداد ماتمطر حقوق المخاييل
وإعداد مايسطع نجوم(ن) لها بون=في صحصح(ن) يازين فيه التعاليل
يامرحبا مادام للهرج مضمون=ترحيب وافي في جميع المكاييل
في ديرة محمد ولد زايد العون=عوين راع الحق مايقبل الميل
شيخ(ن) يجله من حوى رأس وعيون=شيخ(ن) بوصفه يعجز القال والقيل