يازعب يازعّابة الما مع اللبن=يازعب ياللي ماعرفنا جدودها

تهيَّضْت ياسبّاع لدارٍ ذكرتها=ولاعاد منها إلا مواري حيودها
سبّاع أمّك تبكي بعينٍ حفية=ودموعها تحفي مذاري خدودها
ولكنّ وقود النار باقصى ضميري=هاضَ الغرام و بيّحَ الله سدُودها
ولكنّ حجر العين فيها مليلة=ولكنّ ينهش موقها من برودها
دمعي! يشادي قربةٍ شُوشليّة=بعيدٍ معشّاها زعُوجٍ قعودها
زِعبيّةٍ ياعمّ ماني هفيّه=ولاني من الليّ هافياةٍ جدودها
أنا من زِعبٍ وزعب إليا أوْجَهوا=على الخيل عجْلاتٍ سريعٍ ردودها
أهل سربةٍ لااقفت لاكِنّها مهجّرة=وِاليا أقبلت كنَّ الجوازي وُرودها
ولاطاح طايحهم بشوفي ترايعوا=تقول فهودٍ مخطياتٍ صيودْها
ولاصاح صايح بالسبيب! إفزَعوا له=وعزّي لغمرٍ ثبَّرت بهْ بلودها
لحقوا على مثل القطا يوم وَرَّد=متغانمٍ عينٍ قراحٍ يرودها
خيلٍ تغذَّى للبلا و المعارك=ترهِق صناديد العِدا في طرودها
لا تلقّحونَ الخيل يا زعب ياهلي=ترى لقاحَ الخيل يردي جهودها
إن جَتْ سماحَ الخدّ! مايلحقِنْ بكم=وان جت مع السّنْدا لزومٍ يكودها
جانا الشّريف بدارنا وإلتقينا=عليناالقبايل جامعينٍ جنودها
طَلَبْ علينا الخُورهجمة قصيرنا=مصملٍّ يبغي حنازيب سودها
يَامَا عطينا دونها من سبيّه=تسعين صفرا حسبها ومعدودها
تمامها شعيطان..خيّالة مهوّس=أصايلن صنع النّصارى قيودها(1)
يقطع قبيلةٍ ضفّها مايذرّى=تشبه جمالٍ عظها في بدودها
قصيرنا في راس عيطاً طويله=يحجّي ذراها من عواصيف نودها
عيّوا عليها لابِتي واحتمُوها=بمصقّلاتٍ مرهفاةٍ حيودها
حَرَبْنا وتوّ البنت نشوٍ بها أمها=لين إستتمت واستوى زين عودها
تسعين ليلة والعرابا معقّلة=شمخ الذرى ومحجزاتٍ عضودها
شقح البكار الليّ زهنّ الجنايب=قامت تضالِع من مثاني زنودها
خيلٍ تناحيها وتضرب بالقنا=مثل التهامي يوم أحليّ جرودها
وبنات عميّ كلّهن شقّن الخبا=بيضِ الترايب ضافياةٍ جعودها
على الحنايا ناقضات الجدايل=سمر الذّوايب كاسياتٍ نهودها
وجيهٍ تشادي مزنةٍ عقربيّة=أقبل مطرها يوم حنّت رعودها
كلهن نهارَ الهوش ينخَنْ إرجالهنْ=ستر العذارى بالملاقا اسودها
لباسةٍ للدّرع والطاس باللقا=وعلى سروج الخيل كودٍ سنودها
مِن صِنع داودٍ عليهم مشالح=تجيبه رجالٍ مِن غنايم فهودها
ياما إطعنوا من حربةٍ عولقيّة=شِلفٍ تلظى يَشرَب الدَّم عودها
الليّ ايتموا في يوم! تسعين مُهرة=مامنهن الليّ ماتلاوي عمودها
وتسعين مع تسعين والفين فارس=تحت صليب الخدّ تِطوى لحودها
تسعين بني عمي وابوي واخوتي=وتسعين فارس واللواحي شهودها
قبيلةٍ كمّ أذهبَت مِن قبيلة=لاعِدّت الجودات! ينعَدّ جُودها
زِعب هُم أهلَ المدح والمجد والثنا=من الربع الخالي للحجاز حدودها
إن أجْنبوا! فالصّيد منهم تحوّز=وضيحيها ومن الجوازي عنودها
وِن أشملوا! تهجّ مِنهم قبايل=ودارٍ يجونه! ضدهم مايرودها
لامِن نوو في ديرةٍ! ينزلونها=تِقافت الاظعان عَجلٍ إشدودها
إركابهم يمّ العِدا مِتعبينها=بيِض المحاقب مفتراةٍ لهودها
يَامَا خَذوا من ضدّهم مِن غنيمة=ولا ذوّقوله لطمةٍ! مايعودها
بنَمرَاً تشـادي للجراد التهامي=ماطاعت الحِكّام من عظم زودها
أشوف بالحَرّه ضعونٍ تقللّت=وابوي حمّاي السرايا يذودها
شَفّي معه صَفراً تباريه عَندل=مَرٍّ يباريها..ومَرٍّ يقودها
وانا! فتاة الحيّ بنت إبن غافل=وكم مِن فتاةٍ غَرّ فيها قعودها
شرشوح ذَودٍ ضاربٍ له خَريمة=ما ودّك يشوفه بعينه حسُودها
حوّلت من نظوى ورقيت سرحه=وسوّيت عِشٍّ في مِثاني فنودها
وجوني ركابٍ نوّخو في ذراها=وشافنيْ عِقيدَ القوم زيزوم قودها
قال انزلي يابنت وانتِي بوجهي=ولا جيته إلاّ واثقه من عهُودها
أمرٍ كِتبه الله وصار وتكوّن=تسبّب عليّ من الأَعادي قرودها
بكونٍ شِديدٍ ماتمنّاه عاقل=تعدّه عيالٍ عادها في مهودها
ذكرت وقتٍ فايتٍ قِد مضى لهم=ويومٍ علينا من ليالي سعودها
ضوٍّ زمت للمال من غب سريَة=وضوٍّ زمت عودان الارطىَ وقودها
لكنّ قرون الصّيد باطراف بيتنـا=هشيم الغضى يدنى لحامي لهودها
تسعين عينا صيدنا في عشيّة=وضيحيّةٍ نجعل دلانا جلودها
قنّاصنا يروح شريقٍ وينثني=ويجي بالجوازي دامياةٍ خدودها
وروّاينا يارَد بيومه وينثني=ويجي بالعلاسي لاحقاةٍ حدودها
وغزّاينا يغزي بيومه وينثني=ويجي بالعرابا ضايمتها ديودها
لنا بيـن ((حَبْرٍ والغْرابات)) منزل=نهدّ في زيَن العرابا قعودها
حنّا نزلنا الحزم تسعين ليلة=وغلّ الأعادي لاجيٍ في كبودها
لامن حجى معنا عليمٍ ولا ذرى!!!!=إلاّ شخوص العين قَباً نقودها
ِقليبنا غزيرةَ الجمّ عيلم=ما ينشدون إصدورها من ورودها
طولها ثمانٍ مع ثمانٍ مع أربع=وسطٍ من الصفرا وقبلي نفودها
أهل عقلةٍ بالحاذ حدٍ من الغضى=مادارها الزرّاع يبذر مدودها
ألفين بيتٍ نازلينٍ جباها=والفين بيتٍ بالمظامي ترودها
تخالفوا في يوم تسعين لحيَه=علشان وقف الأجنبي في نفودها
دارٍ لِنا ماهيب دارٍ لغيرنا=تحدّها الرّمله والموارد عدودها