ياللي تقول إني مع القوم مغرور=مغرور هذي ..!! يا عميلي كبيره
قول مترفع عن هل العمي والعور=وأبصم على ما قلت بأم الذخيره
وما دمت أنا عند المطاليق مخبور =من يمكم ما ضاع كبر الشعيره
بأبقى على ممشاي واطاوع الشور=لن قدمه منطوق راع البصيره
ولا الردي لا شك ماله معي دور=يلقى على ممشاه ردين خشيره
منهي مع العراف مثله ومامور=ورعه ليا من تاه ما يستشيره..!1
وقولي على ما قال لا غيب النور=كل"ن" على ممشاه يشعب بعيره
اللي يريد السور يمشي على السور=واللي يبا المرقاب يعرف مطيره
وأنا أحمد الخلاق في غبة بحور=أسبح .. وأضد الموج وألجم هديره
وليا رقيت الضلع لو أشرح شعور=صدري لقيت الحال صعب (ا)تعبيره
صقر على المرقاب من حوله صقور=والبوم يزعج في طمانه شخيره
يعني كذا شتان يا شلة الزور=بين الطمان وبين روس الشهيره..!!
ويعني كذا شتان يا شلة الجور=بين الغناة وبين نفس فقيره
رجل يموت ولا يقلط على السور=ورجل ورا العربان تسمع صفيره
ويالله أنا طالبك يا ساتر الحور=تضفي على الجهال ثوب الستيره
قوم"ن" توردها ولا قالوا صدور=ما صدر الجمه زبون القصيره
قوم لو ان الهرج لقمه فـ... حنجور=ودك تغص ,, ولا تبيح السريره
أطيبهم اللي في تلويه محشور=حقده يقرب من شهيقه زفيره
حقدٍ لو ان الثوب مزرور مزرور=زفره وتصبح كلبوها نثيره
ولكن عين خير .. والحال مستور=ياللي تعذرب وأنت ساقك كسيره
هذي عوايدنا من عصور وعصور=درب المراجل ما جهلنا مسيره
نضرب تحت سبع الأراضين بجذور=ومن فوقها فوح الأراك وعبيره
وليا لقينا الحب فالدرب منثور=ما نختلف دام الرحى مستديره
وإلنا مع أهل العرف مذهب ودستور=في يسرها ولا نهار العسيره
علم"ن" وكاد ولا على الطيب قصور=كل يروم الصيد ويهد طيره
وختامها لو نحسب لكل عصفور =كان الدخن وسط المخازن مصيره