سلامي عليكم يا هلَ الجود والفزعات=سلام السما للقشع يوم الحيا بله
من امس الضحى و غيومها تذرف الدمعات=تقول انها تشكي هموم العمر كله
حجب شمسها غيمٍ تحس ان له غايات=يبي كل طرفٍ يبحر الحسن ما مله
و عينٍ تعاينها و عينٍ بها الحسرات=تخايل لها (عتيبه) و هي عند ابن دله
لها ايام و الاحداق تصلى بها الجمرات=و رمش النواظر ما ارتخى للوسن ظله
ألا يا سحاب الوسم هلي بعد مرات=على دار قومٍ تكرب الحبل و اتحله
لهم سطّر التاريخ في سيرته صفحات=على شرعة المنان ما حادت المله
ضروس العدا مروين يوم الوغى حدبات=جزال العطا ذباحة الحيل من حله
عساهم بامان الله من الضيم والنكبات=ليا كل خلٍّ لاذ بالنفس عن خله
و عساهم بيوم الحشر في عالي الجنات=تحت ظل من لا ظل ياكود من ظلَه
و انا الله يروف بحالتي ما بايدي اسواة=سوى طلبته لا كشر الليل عن غله
سواة الجريح اللي دباه المرض باسكات=بقفرٍ جهام الصيف يخطيه و ايدله
و اذا جا عصير الوقت والتمت اللوعات=و بدا خالجي يستلهم الحزن و ايفله
تقصّيت بارضٍ خاليه ما بها لجات=مغير ام سالم تغرف السجع و اتزله
و رفعت الكفوف لوجه من يجلي الضيقات=و يعلم خفا صدرٍ تزايد به العله
و مشّيت بالغتره دموعٍ على الوجنات=تجشّمت اعالجها و هي كنها المله

المشاركة الأصلية كتبت بواسطة عبدالله الجـــذع (المشاركة 783853) احساس رائع وقريب وصادق لمسته في هذه القصيده النسر صح لسانك حتى ترضى يالغالي والله يكتب لك اللي فيه الخير محبك .,

عزيزي مرزوق الجعيد

صح بدنك يالغالي

و الأبدع مرورك

و لا هنت ألف

المشاركة الأصلية كتبت بواسطة معجب العتيبي (المشاركة 784782) صح لسانك احساس جميل وقصيده رائعه

المشاركة الأصلية كتبت بواسطة مقاطي الهيلا511 (المشاركة 784793) صح لسانك ياولد العم

المشاركة الأصلية كتبت بواسطة ترركي (المشاركة 785317) بسم الله الرحمن الرحمن الرحيم الله يصبحكـ بالخير ياخوي وصح لسانكـ يالنسر ( اسم على مسمى ) تقبلني ضيف جديد عليكم نجي للجد القصيدة تدل على انكـ شاعر متمكن وفاهم بالأوزان . وكتبتها على وزن ماهوب سهل .. مو اي شاعر يقدر يضبطه ضبط كامل يعني الشاعر المبتدئ يمكن يضبطه لكن مو بهذا الشكل . وفيه ابيات كثيرة اعجبتني : اعطيكـ منها . ((سلام السمـا للقشـع يـوم الحيـا بلـه)) ((يبي كل طرفٍ يبحـر الحسـن مـا ملـه)) تقصّيت بارضٍ خاليـه مـا بهـا لجـات مغير ام سالـم تغـرف السجـع و اتزلـه هذا أحسن بيت بالقصيدة مرة ثانية أقول صح لسانكـ ولا تحرمنا من جديدك شكراً

المشاركة الأصلية كتبت بواسطة أبو فيصل الدلبحي (المشاركة 785322) صح لسانك يابعدي تقبل مروري