أبشر بقاف يشيب راسك منه قبل انّه يشيب=أكتب لك أبياتي على الصفحه و تكتب ردّها
في ذمّتي يابو لمار أمرك بـــهالدنيا غريب=من لا حمد ربّه على النعمه يحصّل ضدّها

ابو لمار ايقول لك ناقتك مافيها حليب = اديوسها يادوبها لعيالها وتسدّها
انا احمد الله مير بعض الناس عجبه ياعجيب = ياكانز الاموال عندك كيف تحسب عدّها

لا بالله انته ناقتك من قشر حظّك ما تجيب=و بالميسم الحامي طرحنا وسمنا في خدّها
الليله الليله يبا يكشف عليك أكبر طبيب=وصلك و أمواس العمليّه ما غير يحدّها

خابرك انا من عام الاول وانت مقطوع النصيب = لكن يمناك الكريمه للنشامى مدّها
قلي متى ياصاحبي ابو الحصين يصير ذيب = حتى نقول ان الحصاني قيسها او قدّها

تراك جنديٍ منتّف .. طامع برتبة رقيب= ماهي في صالحك الامور إليا تعدّت حدّها
أظنها ما هي بعيده منك يالصاحب قريب=الناس ما تمزح معك تهرج معك من جدّها

هاذ انت وعلومك قديمه حامل" رتبة نقيب = لاتفضح اسرار الرتب روحك تبيّح سدّها
ام الكباير ياعلي بذنوبها ماتستعيب = من فسقها حتى بيوت العز تبغى هدّها

أنته على نفسك ما تجلب غير عيب و شقّ جيب=خل المكاسب للرجال اللي عريبٍ جدها
يابو لمار ام الكباير فوقها نضرب صليب=و ليا ضربنا فوقها هات العلوم و ودّها

حنّا نقول الحق يوم انته تشوف الحق عيب = العيب كل العيب في قوم" تغثرب عدّها
ياجعل ظني فيك بعد اليوم يالطيّب يصيب = لكن ياراعي الكرم عشّ الضيوف وغدّها