قالوا تشجع قلت آشجع منتخب ماقد خسر=طول عمره فايز ورافع كؤوس الإنتصار
قالوا وشهو منتخبك المانيا والا مصر=قلت اعقبوا ماهو أنا اللي يتبع لأيا شعار
لي منتخب آشجعه ونا من أيام الصغر=ما أنسب لغير وسمي لو بعد الإحتضار
أنا أشجع لابتي شرابة الدم الحمر=إيه هيلاوي صميم آقولها الكم باختصار
فوزهم بالسيف ابو حدين ماهو بالكِوَر=في ميادين الوغا ماهو في ملعب به خضار
أخصامهم في وقتها مايكسبون الا صفر=اللي يواجههم يريد التهلكه والإنتحار
إيه آشجع من بقولة نعم بفعاله ظفر=كل إصبع يم ربعي بإختيار النعم آشار
تشهد بشاشتنا في وجه الضيف لامنه حضر=ودلال ماتفضي ولاتاقف وباللحظه تدار
قهوتهم تحلى بأحدث نوع من أجود تمر=والعود الازرق فالجمر منهم يطيب وطيب صار
ويشهد لهم أكبر صحن ومعرّفه أكبر قدر=ويختّم السنام قولي بعد توقيع الفقار
خويهم يفخر بهم عند البشر طول العمر=لامن مشى معهم سبع خطوات في نفس المسار
خويهم ودخيلهم والجار محدن قد سهر=من ظلم والا جوع والا ينتدوّر فيه ثار
وليا نِخِي الرجّال يفزع إن قدر ون ماقدر=يقضي لزوم اللي انتخى من عند أصحاب القرار
لوّي نظمت معلقه في لابتي تصبح شطر=والله ان القاف شايب منهم وجاله وقار
ولو أعاين بالتلسكوب المقرّب للنظر=مايقربلي فلك مقامهم ولا المدار
أصغر الأفعال لن قلته يقف منه الشعر=ويهد له أكبر جبل ويزلزل اعماق البحار
أصحابهم تفرح بهم وتشوفهم مثل المطر=وعدوهم لاشافهم كنه يشلهط فوق نار
والنعم في كل القبايل كلن بفعله شهر=كلها وسط الجزيره تنذكر ضمن الخيار
ما أحتقرهم قالوا العرّاف يحقر من حقر=بس شاعر وآفتخر وابسط حقوقي الإفتخار
هم محزمي هم عزوتي هم مسندي هم الظهر=هم فزعتي من بعد ربي كان في الوقت جار
ماش فرقن بينهم فالبدو والا فالحضر=ماتغيرهم ثقافة غرب بالأفكار آغار
أبواننا واجدادنا نمشي وراهم بالجرر=مانحوص بدربهم يمنه ولا حصنا يسار
ربعي كباتن فالمراجل والعلوم اللي تسر=ماهم كباتن في لساتك أصلها جلد الحمار
يكرم السامع وقاريها وتكرم يالشعر=مير قول الصدق لازم ينسمع مني جهار
حنا بعصر الكوره وتشجيعها أمحق عصر=شفت بعض الربع يتبعها ولو تندار دار
وشفت باسباب الكِوَر صاير مابين الناس شر=حنا جبال ولن تبعنا الكوره نظلي غبار
هذي وصية أسعدي وتدق ناقوس الخطر=لاتفرقنا الكِوَر ويسجل التاريخ عار
لا هلال ولا نصر حتى الخضََر ماهو فخر=دام راية ديننا طاحت وتشكي الإنكسار

خويهم يفخر بهم عنـد البشـر طـول العمـر = لامن مشى معهم سبع خطوات في نفس المسار
خويهم ودخيلهم والجـار محـدن قـد سهـر = من ظلم والا جـوع والا ينتـدوّر فيـه ثـار

المشاركة الأصلية كتبت بواسطة هايل العتيبـــي (المشاركة 882068) كفو كفو ..ياعبدالله .. صح لسانك واعتلى شانك .. والله يعطيك العافيه .. ....

المشاركة الأصلية كتبت بواسطة محمد العتيبي (المشاركة 882165) كفو كفو كفو .. وحنا نفتخر بك ياعبدالله صح لسااانك مدد بلا عدد على هذه الرائعه .. تحيتي ...

المشاركة الأصلية كتبت بواسطة طلال ناشي (المشاركة 882179) خويهم يفخر بهم عنـد البشـر طـول العمـر = لامن مشى معهم سبع خطوات في نفس المسار خويهم ودخيلهم والجـار محـدن قـد سهـر = من ظلم والا جـوع والا ينتـدوّر فيـه ثـار صح ألسانك ياعبدالله كفيت ووفيت تقبل تحيااااااااتي ومروري

المشاركة الأصلية كتبت بواسطة عمرالروقي (المشاركة 882326) صح ألسانك ياعبدالله كفيت ووفيت تقبل تحيااااااااتي ومروري

المشاركة الأصلية كتبت بواسطة الصقر (المشاركة 882351) صح لسانك ياعبدالله ... وننتظر جديدك يالغالي

أنـا أشجـع لابتـي شرابـة الـدم الحـمـر=
إيه هيلاوي صميـم آقولهـا الكـم باختصـار=

صح السانك والهيلا كلها تشجعك

المشاركة الأصلية كتبت بواسطة الصقر (المشاركة 882351) صح لسانك ياعبدالله ... وننتظر جديدك يالغالي