النّفس لي مدة كثرة طواريها = متكدّره والهموم كثار وثقالي
طواري من أمور حاير فيها = منها التّعاسه بدت تظهر على حالي
بانت بوجهي وبأحوالي مواريها = وعلى فؤاد رعاه الغبن عزالي
رعي الدّبا في فياض لا نزل فيها = وأمحل رباها وعشب رياضها شالي
ما من طرب للمثايل يوم أغنيها = أبي الزّعل عن عزوم النّفس ينجالي
يا الله يا فارج الكربه تسوّيها = لين أنها تعتدل وتزين بأقبالي
حيث المودّة دنت مع ناس نغليها = صارت حقيره ولا توزن بمثقالي
ناس على ما أتصور ذكر طاريها = يجلى عن الحال ضعف ونحل وهزالي
ما كنت أظنّ أنّ راعي الحكي يغويها = ويفرّق المجتمع خبل وجهالي
إلين شفت الشّكالة غاب شاريها = وبيعت زهيدة وسوق أصنافها غالي
تغيّر الوقت ما أدري النّاس جاء فيها = لجّة ورجّه وضعف أيمان وهبالي
لا عاد حتى الصّراحه ما نلاقيها = ولا هي بتوجد مع الأقصين وموالي
مفقودة ما أحد تلقاه يطريها = في مجتمع من سلوا بالقيل والقالي
في قوم تنفخ لغبها مع علابيها = يومين ترضى وباقي الوقت زعالي
نسيت سلوم العرب والعز ناسيها = الحسد والحقد فوق كبودها كالي
شيء تحطّه تجاره من دواديها = وشيء لها فيه مطلاع ومدخالي
من قطرة الماء تسيّل بطن واديها = ومن حبّة الخردلة تبني لها جبالي
فهذي نصيحه لذولا النّاس مهديها = نصيحة من قريحة شاعر قالي
يا قوم عفّوا عن النّمة وأهاليها = الله يزيّن لكم تصريف الأعمالي
الهرجة أللي تجيكم مع مودّيها = تأكّدوا قبل ما تلقوا لها بالي
ولأهل القرابه حقوق وصّلوا فيها = ترى القطاعه نفاد الحال والمالي
والحرص من لطمة للعين تعميها = تروح الأجيال في غلطات من عالي
يا قوم للنّفس وازعها وهاديها = الدّين حصن منيع فيه مقيالي
يبعد عناء النّفس ويهذّب مباديها = ما تعتمل بالغشش تطفيف الأكيالي
وصلاة ربي تختّم به معانيها = على محمّد عدد ما هلّ همّالي