أخير ما أبدابه ذكر ربّ الأرباب = تبارك إسمه وإعتلى في صفاته
اللي يغفر الذنب للعبد لا تاب = وسيّاته الأولى تصير حسناته
والثانيه للشعر قاري وكتّاب = وشعّاره أكثر بالعدد من رواته
وأنا على منهج حسينين الآداب = وأهمّ ماعندي تجي مفرداته
مثل الذهب مصبوب بيدين صبّاب = وإلها من أنظار الرجال إلتفاته
شاعر وأشدّ أنظار وأخاطب ألباب = والشعر أقطّف ما زهى من نباته
وأخير ما أحصّل من الشعر الإعجاب = عند الرجال اللي تميّز طراته
واليوم أعدّيبه على راس مرقاب = لو إن وقته راح تبقى قناته
والماقف الغصّاب ما عنه مجناب = إلا إن ولد العود ينسى وصاته
واللي ليا منّه حضر لازمه غاب = أمه عقيمه والعوانس بناته
لا ناطحٍ قاله ولا مغلقٍ باب = وأخير له من طول عمره مماته
حنّا خلقنا الله على الدين وأعراب = ورجالنا طبع الكرم من سماته
نآرد ونورد للخطر كل هيّاب = ونثوّر اللي غارقٍ في سباته
ونعلّم اللي جاهلٍ حلّ الأنشاب = وشلون يلقى الفايده من حياته
خويّنا يلبس من العز جلباب = وعدوّنا ضيمه وذلّه عباته
هيباتنا يذعن لها كل حرّاب = وإن شافنا ما عاد يضبط صلاته
وسطواتنا لو هي بصم الصفا ذاب = وتاريخنا تفخربنا ماضياته
وفعولنا فيها يحيرنّ الأطباب = صويبنا دايم سريعه وفاته
وديارنا يآمن بها كل مرتاب = من دون ينصانا ونآسم عصاته
وأذوادنا ترعى زماليق الأعشاب = بسيوفنا روض الخطر راعياته
نآطى على الحيّه ونآطى على الداب = وحريبنا ليل العرب ما يباته
آلاد عاصم من زحازيح عتّاب = ربعٍ تجي للمجد فأعلى سراته
وإن قلت قاصر فالمطاليق كذاب = في كل قيفٍ للفخر سابقاته
وفي حفلنا الترحيب من دون حسّاب = والحيل وسمان الحشو ملحقاته
يا مرحبا والقصر والصدر مرحاب = باللي لفاء للحفل من طيب ذاته
حفلٍ يشيدونه مهدّين الأصعاب = اللي عزايمهم تقوّي ثباته
عيال عودٍ بالكرم شبّ ثم شاب = والله عطاه عيال سووا سواته
عتيق جعل الله يعدّيه الأسباب = ما حج من مسلم وزكّى زكاته
وعبيد ذخر العود والعود ما خاب = يوم إن بعض الناس ودّه وهاته
وعقب تخيّر من عريبين الأنساب = الله يحقّق له جميع أمنياته

الله الله

صح لسااانك واعتلا شانك يا سلطان

طيبة من طيب وجزلة من جزل


تقبل إعجابي ومروري

المشاركة الأصلية كتبت بواسطة سلطان البقمي (المشاركة 1204377) واللي ليا منّه حضر لازمه غاب أمه عقيمه والعوانس بناته ههههههههه صح لسانك هذا بيت القصيده .. اول قصيده اقراها لك تحياتي

المشاركة الأصلية كتبت بواسطة مرزوق الصواط (المشاركة 1204387) سلطان ضحكت على البيت فيها بونّه ههههههههههههههههه صح لسانك وهذا بيت القصيده

المشاركة الأصلية كتبت بواسطة سلطان البقمي (المشاركة 1204390) كيف فيها بونّه ؟؟ انا قلت هذا بيت القصيده ولو ما اعجبني لم اعلق عليه الأن تصويره رهيب بمعنى الرجل الخايب محد يخطب بناته. ولم يكن له حضور مع ربعه. وأمه كأنها عقيم لم تنجبه وصف جميل جداً هذا كل مافي الا مر

المشاركة الأصلية كتبت بواسطة مرزوق الصواط (المشاركة 1204391) سلطان انا فاهم البيت لذلك قلت فعلاً بيت القصيده انت وش فيك مستشك ههه