يقولون ( عين العقل ) واقول (عقل وعين) = ليا اجتمعت الثنتين في شخص يازينه !
وانا استبعد ألقى فآدمي هذي الثنتين = ومن فيه هذيّه تباين براهينه !
ولاهو بكامل لو خلقه الله ابقلبين = ليا خالقه ماجمّله صار ياشينه !
لكن الكمال لخالق ابن آدم امن الطين = هذا عقله ايغرّه ..وذا خانته عينه !
هذا ماطرالي والحقايق تجي بعدين = وخط الرساله واضح ٍ ..من عناوينه !
ياكثر المجنّن / كل ما اتذكّر الصاحين = زمان ٍ مجانينه طغت فوق صاحينه !
وياكثر الكلام الشين .. واهل الكلام الشين = وعسى الله يساعد راعي الصبر ويعينه !
على وين رايح ياقليل المعرْفه وين = رفيقك تذمّه ليه ! وش بينك وبينه !
ماتدري ان هرجك فالقفا ياغراب البين = يحمّلك ذنب / وهو تثقل موازينه !
ابو وجه واحد / ماحسب لك يابو وجهين = مسميك فعلك / والنشاما مسمينه !
بنيت اغلب ارائك على الضن والتخمين = وهذا مسوينه / والآخر مسوينه !!
ألين ابتلشت بنفسك وصرت بين وبين = تحسب ان راع الشر تفلح معاوينه !!
وانا والله اني بالحكي ما ألحق المقفين = لو انه ليا قفيت قرّب سكاكينه !
اسامح وادوّر عذر للجاهل المسكين = ماودي ان بعض الناس تركض شياطينه !
واقدّر واجامل حشمة أصحابي الغالين = ومن لا حمل زلاتهم شلّة ايمينه !