يالله يامعبـود ياعـالـم الغـيـب = ياواحدن كـل المخاليـق ترجيـه
ماغيرك الي نطلبه خيـر ويجيـب = وماغيرك الـي فالنـوازل نناجيـه
الوقت خلا الورع في راسه الشيب = والشر في كـل النواحـي نلاقيـه
راع الخطاء تال الزمن عوٌد مصيب = وراع الصواب اتساق فوقه مشاريه
ماعاد نسمع راعي الجود والطيـب = ماعاد نسمع غير " مازن " وطاريه
الي يجاهر بالشرف صار له عيب = والي يجاهر بالردى .. حيٌ راعيه
وين السيوف الي تقص المشاعيـب = في حكم شرع ٍ ينطق الحق قاضيه
فالشرع مانلقى نقـوص وعذاريـب = شرع ٍ منزٌهه بامر ربـي وحاميـه
احوال جيل اليوم صارت تعاجيـب = ماعاد تدري بنـت ولا ولـد بيـه
ما به شبيه الصقر والنمر والذيـب = مغيـر زول ٍ تطلـب الله يشفيه
اطلق شنب فيهم تحصلـه شنيـب = مايصبح إلا لين بالمـوس يعطيـه
لو حدٌه الله للظـروف المصاعيـب = ماهو حزام ٍ لآقشر الوقت تشريـه
تلقى دموعه فوق خـده مساكيـب = يدٌور الـي طـول ليلـه يواسيـه
حيً الذياب الي في روس المراقيب = الـي ليـا نـاد المنـادي تلبيـه
عنك الورق مايذخره داخل الجيـب = يقضي لزوم الـي لزومـه معنٌيـه
إلها في دار العز بيت ومضاريـب = منصى الرجال الي لها علم تبديـه
دام الكرم والجود طبـع المعازيـب = مايلحق النقصان من هو قلـط فيـه
هذي علوم ٍ تمسح الجرح ويطيـب = ماهو علوم الي علومه توطيه