لا جيت تدعي على الي شايفٍ حاله=قل جعل مسكنك ما بيـن العزوبيـة
في شقة ضيقة والحـال يرثـا لـه=والا استراحـة وفتحتهـا جنوبيـة
يشوف له شي ما يخطر على بالـه=ويجيه من شوفته صدمات نفسيـة
مرة من الدلة يصب اله ف(بيالـه)=وامرار ياكل لحمت الفاطـر النيـة
ولا شاف صف البصاطير يتهيا لـه=صفة سقوسٍ على شيب البجاديـة
من كثر الازعاج في سمعه يورا له=تقول سوقٍ يعـج مـن الشريطيـة
اعقلهم الي سكـت يلعـب بجوالـة=والا يلـف القنـوات الفضائـيـة
وان جاء ينام المصيبة كيف يلقى له=مكانٍ .. يريح ابه اعصابه شويـه
على حسب قولهم كلا علـى فالـه=خذ راحتك زين والدعوى سعوديـة
هذا يحـط الفـراش وذاك يشتالـه=ولو نمت ما عندهم لمبات مطفيـة
وان جاء نهار الربوع الخط عزاله=اللي يفرّك صبـاح يخلـي وخيـه
قريـب والا بعيـد تقـول رحالـة=الجمعة يعـودون عصيـر طرقيـة