تواصليه

يانجوم الليل لو غبتي عن الروح السقيمه = لا تظني يانجوم الليل ؟ اشوفك فالقوايل !
سكّتي دايم مثل (نهج السراط) ومستقيمه = ما التفت في راي خبل ولا استمع في قول قايل
اقدح الافكار من راسي وانا قلبي صتيمه = ما يخطط للضعوف ولا يفكّر بالهزايل
و أرتقي بالظّن فوق وكل شيء اعطيه قيمه = وكل شيء بقيمته يفرق ، وله عندي دلايل
عارفٍ فالناس عاقل ، مير فالعالم بهيمه = وخابرٍ فالوقت عدل وخابرٍ فالوقت مايل
ان تحمّلت الثقيله ؟ شلت في حقي ظليمه !! = وان عفيت عن الخطيّه صرت معدوم الوسايل
يانجوم الليل ماعندك عطاء ، ولاّ ، حريمه = العطاء في ايدين ربي حين يعطينا الجزايل
ان طلعتي وان غربتي ! ماعلى الدنيا مقيمه = كل نجمٍ بالسماء لابد له موعد .. وزايل