يالله ياللي تغسل الارض بالسيل=اغسل قلوب اهل الحسد من حسدها
وترد كيد اهل القلوب المغاليل=بنحورها وعن الوجود تحصدها
واجعل لنا من باب يسرك تساهيل=مدات جودك نستمد بمددها
بارك لنا بالمد والصاع والكيل=و نفوسنا عطها القناعه و زدها
واحفظ فهد وامهل له العمر تمهيل=واحم البلاد المنعمه في رغدها
من منبر المحفل بدعت اجمل القيل=أقطف من اطراف المعاني جددها
الشعر سبك و حبك معنى و تجزيل=اسبك بيوت الشعر واحبك عددها
اكحل عيون الشعر كحل بالميل=و امسح مدامعها و اداوي رمدها
يا مرحبا بمجمّل الحفل تجميل=ترحيبة ٍ تبسط على الصدر يدها
بالواصل اللي فيه للوصل توصيل=يمناه بالمعروف كل ٍ حمدها
ركنه حجا يذري و ظله مقاييل=حاز المراجل كلها وافتردها
بيته لعطران الشوارب مداهيل=من دون وجهه خزنته ما اقتصدها
ينصونه العربان مشي وزرافيل=شمايله ما خيبت من قصدها
فعلٍ عليه شهود ما هو باقاويل=نعم اليمين اللي وفت في عهدها
يحيا الكريم و له معزه و تفضيل=يبقى وتبقى قيمته ما فقدها
هذاك ابو متعب رفيع المنازيل=اللي بنا هام العروش و صعدها
سارن اباكير المثايل محاميل=بحمولها تسعى جهدها جهدها
ما بدلت عن منقع الطيب تبديل=ترسي تحت بيت المروه وتدهى
بيت الشرف والفضل عذب المناهيل=فيه الشهامه سنها واعتقدها
سلطان ابو خالد مغيث المقاليل=عاش فقرا و بحر ماله رفدها
هذا وانا مستحضر الفكر بالحيل=تصحى الحواس الخمس مما وردها
يا محلل الموقف نبي منك تحليل=وش خطة ٍ في خاطرك تعتمدها ؟!
ذاب السلام وصار مسرح وتمثيل=سجدة سهو تاجب على من سجدها
مافي الحقيبه للعروبه محاصيل=سوالف ٍ تصدى الكبود بكبدها
وش منطق الاجيال من بعد هالجيل=يا حسرة التاريخ وأمر وادهى
الله وانا سآله يدمر إسرائيل=نشي غضب ربي عشا و يهجدها
يلقح بسحب مثل حمر الغراميل=عج ٍ مطرها والزلازل رعدها
تمطر سخط منها الصواعق نوازيل=يسكر هواها و يتصلخ بردها
يجتثها الرحمن بجناح جبريل=وتصبح معالم للعرب من بعدها
تكتب على الخنزير طه وتنزيل !!=يا نجس مبداها وما اكبر حقدها
والله جريمه منكره يا رجاجيل=حتى الدول بأعرافها تنتقدها
الصبح فوق كلابها تلقى الانجيل=جرثومة ٍ دب المرض في جسدها
استفحلت واللي عليها مهابيل=قامت على انقاض الخيانه عمدها
من الفرات بخارطتها إلى النيل=وعصابةٍ تسرح وتمرح وحدها
عنها الصواب بعيد جمله و تفصيل=عميانة ٍ في غيّها عن رشدها
عقرب ثرى مسمومة الراس والذيل=من حر ما فيها تنفخ غددها
عاشت على الكذبه دعايه و تضليل=جاها فناها يوم ربي قردها
من حارب الله له مهونه و تذليل=في ساعة ٍ من غيب لا تبتعدها
ألم ترى كيف اهلك الله هل الفيل ؟=دك ابرهه و جيوشه اللي حشدها
جاه الجزا الصارم عقوبه و تنكيل=وينه و وين اصنام رجس ٍ عبدها ؟
شافت فلسطين الجريمه بهاذيل=شابت قضيتها وشيّب ولدها
خمسين عام علوم صحف و مراسيل=في حالها عن حالها من نشدها؟!
مراوحه بأقدامها فالمحابيل=عن راسها قام يتقطع زبدها
إلى متى تصبر على الظلم والويل=ذتب ٍ على من هانها واضطهدها
تبكي وتغرق بالدموع المناديل=تنخى فهد تنخى فهدنا فهدها
تبي صباح به صياح وتهاليل=يقضي على الفتنه وهي في مهدها
بقوة الايمان حنا هل الخيل=الالويه بأسم الجهاد نعقدها
فالحرب نثبت في وجيه الاساطيل=مواقف ٍ من شافها ما جحدها
حنا العرب حنا الرماه النواجيل=نضرب على قمع الرصاصه زندها
من حبنا للموت نهذب له هواذيل=والنفس قبل تموت تأخذ سددها
اليا ادبر المهزوم حنا المقابيل=كم وقعة ٍ وشعب الجزيره شهدها
والآن ولى الزحف نزحف جحافيل=جحافل التوحيد في رأي اسدها
بقيادة اللي يركي المتن للشيل= عنا ثقيلات المحامل صمدها
فهد فهد ضاري شرب الفناجيل=اليا برزت دهم الجموع يعبدها
حلاّل حيل الحلاحيل حلحيل= يحلحل اللي ما تحلحل عقدها
دليلنا وإن غاب نجم الدواليل=على الهدى ديرة مساره رصدها
نفداك ونصّر الرشا بالمحاحيل=ياللي حفرت لدفن الاعداء لحدها
معك أمة الاسلام تصهل تصاهيل=قدها يا بو فيصل إلى القدس قدها