تسألني عن اخر قصيدي وانا اقول = عنه ان سألت اسأل من الناس غيري !
تلقى الجواب ومنّي العذر مقبول =ولاتلومني لن كان برقعت طيري !!
لك وقت ياباب الهواجيس مقفول =وعلى ماقلته ! كثر الله خيري !
ماعاد لي قوّه ولاعاد لي حول =لو ماقليلي بالعوض في كثيري !!
قناعتي به رافقتني على طول = ومن اجلها حاولت احدد مصيري !!
ماني عن الشعار والشعر مسوول =ياباخره في بحر الأدراك سيري!
ادري ان كف الشعر له وقت مغلول = وهذا هو اكثر مايحزّ ابضميري !
اللي خفى سيف ٍ مذهب ومصقول =واللي ظهر كله فقاعات فيري !!
وعقد ٍ مرصّع بالجواهر وباللول =يبيعه المحتاج ببلاكـ , بيري !
معقول لاوالله ماهو بمعقول = لو دبلجوا فأفلامهم ( توم جيري )!!
ماني بقايل مت ياشعر مقتول = الا طعنت بسيف من كف غيري !!
( جريمة ٍ قد سجّلت ضد مجهول )=راحت مثل روحة رفيق الحريري !!