ارتفع يا صقر عن جوّ الرخوم=دام شفـّـك في صغيرات الحمام
ما عليك البوم ما يقدر يحوم=ما يحوم البوم إلا في الظلام
ولا تهمـّـك ثرثرة سود الغيوم=بالشهامة تستوي متن الغمام
واخفق الجنحان عن صلف العلوم=خلـّـها تنزل على رؤوس النعام
واحذر الغربان فطسان الخشوم=مالهم معروف ورعان الحرام
واحذر الصيـّـاد محروق الهدوم=صايدك بالنار وإلا بالسهام
واحذر البيـّـاع دسـّـاس السموم=قاتلك بالجوع ما فيها كلام
واحذر المغرور شرّاي الهموم=ما تهمه سمعته عند الأنام
لا تطير إلا مع الحر القروم=ارتفع عن جوّ الأوغاد اللئام
ولا تصيد إلا الشحم بيض اللحوم=خلـّـها للكلب عرمشة العظام
وعزّ جارك دام ساكنك الرجوم=وإن لقيت الصيد فإقسم بالتمام
ولا تخلي صاحبك وقت اللزوم=وقت تفريق الخوال من العمام
إنتهض يا صقر تفداك الرخوم=علـّـم الجهال تفسير الكلام