يمه ولو تدرين وش كثر محتاج=لصادق الدعوه ولك دايم آحوج
في ليلة ن دجداجها فالدجى داج=لاقمرتن فيها ولا بارق يبوج
والجو هادي وأقرب الوصف سجساج=والفكر بالافكار محتار ويسوج
تزعجني الخطّار وتعـقد حجــاج=بيني وبين النفس احاديث وهروج
هرج ن يعده خاطري كل ماهاج=ساعة يهم الهم واحيان مفروج
احسني لك مصدر الخوف وإزعاج=زعلانة ن مني وخاطرك مزعوج
مـن فعلـتي كنـي مكبـل بالإحراج=وقلبي سبايب زعلتك صار مفلوج
ياواقفة دايم على خـط الإنـتاج=عقب التعب تلقينـني خيـر منتـوج
انتي فطريقي شمعة الفال وسراج=فدوتك روحي ومضغة ن داخل العوج
قدرك فعيني صرح ويضاهي أبراج=وفضلك كما شلال يحيي له مروج
ضحكتك بهجة خاطر لجرحي علاج=ورضاك برد بداخل الجوف وثلوج
لرضاك اخوض الليل مسرى ومعراج=واسوق رجلي لجل بسمتك وآدوج
وابحث عن الي فاقده فيني خداج=وإلقاه دام مناك لي درب مفجوج
واجلسك عرش ن مفارشه ديـباج=عليـه مـن كـل المـرامـات منسـوج
واوفيك من فضلك واتوجك بالـتاج=ويصير قلبك داخل إحشـاي ممزوج
الأم قـالـوا مدرسـة دون مـنـهـاج=وانــا اقـول امي ضيا كـل منهـوج
يمه ترى مانيب جاهل وهجّاج=مامشي على المايل ولا اقدر العوج
لو ينطفي نوري وتتسكر فجـاج= ويعجز سمو الذات عن كل معروج
والله ماجحد فضل هامر وهداج=من قلبك الي صرت برشاه محجوج
رويتي الي يمشي الليل مدلاج=وكان يتمنى من الرتوقات مدلوج
ياليتني صايم وانا محرم وحاج=وادعي عسى تبقين للي لك يحوج
طالب رضاك لدعوتك حيل محتاج=ودي يزاح الهم ويصير مفروج
وآخر كلامي يالفخر انتي إفراج=لضيقة ن فالصدر وتكسر العوج