الهيـــــــــــــلا *** منتدى قبيلة عتيبة - مدري متى يفرج عن همومي الله ؟

للذكريات في قلب الإنسان أيا كان جنسه وعرقه زاوية تحتوي على أشرف الأرفف وأثمن البسط
أعرض بعضها أمامكم لعل منكم من يشاركني في : متى .. بـ أمل قريب إن شاء الله تعالى .

لا شفت مزنٍ في دجى الليل ساري ×× له بارقٍ يضوي دجى الليل كله
سريت مع برقه ورى كل طاري ×× أسج في ليلي على كل عله
أسج وأضوي في دجى الليل ناري ×× في عود نبت ميل الجدب ظله
له مدةٍ بين الظمأ والذواري ×× ما بل ريقه من حيا المزن بِلّه
أشعلت به وأقفيت أراقب مداري ×× في رأس مرقاب منيفٍ مطلّه
أراقب البرق المقفي وأداري ×× في خاطري بعض الهموم المملة
أقول : ليته طول ليلي يباري ×× شوف العيون أتليه وأرقب محلّه
وأجاذبه ما كان في القلب جاري ×× مواجعٍ في داخلي مستحلّه
أجاذبه وأشكي زماني وأواري ×× تحت الدجى دمعٍ عيوني تهلّه
دمع الأسى ، دمع الندم والمراري ×× على زمانٍ فات وقته وحِلّه
على زمانٍ يمه الشوق ساري ×× من خافقٍ حبل المودة يتلّه
من خافقٍ جرحه من البعد عاري ×× بين الخلايق والخلايق تسلّه
أقفى جداه وراح يقدح شراري ×× بين الظلام ولا لقى من يدلّه
لا ساكنٍ جرحه ولا هوب باري ×× والشوق من طول المفارق يظلّه
كلما ذكر من ماضي الوقت طاري ×× يزداد جرحه ويتوسع مشلّه
والدمع في عينه تحدر و حاري ×× يبكيه لين الدمع ينشف محله
طول النوى ، طول الشقى ، وإنكساري ×× عقب المفارق زادت الحال ذِلّه
الله من وقتٍ تقلب وداري ×× علي وأقفا بي عن الكون كلّه
عن ديرتي عن موطني عن قراري ×× عن كل ما يهواه قلبي ويجلّه
عن نبتي اللي مات بين الصحاري ×× أذبل ولا بله من الوصل بِلّه
وأمسى على عوده تراب الذواري ×× ما عاد يحيا لو حيا المزن عَلّه
عقب الجفى ، عقب الشقى ، والصغاري ×× مل الجفى من صاحبٍ كان خلّه
ما أقول إلا : ليت ربي يواري ×× تحت الثرى غصنٍ ثوى في محلّه
كود المطر لا جاه عقب اندثاري ×× يحييه في قلب بذكره تولّه
لا جاه مزنٍ تالي الليل ساري ×× يبكيه لين يفوح ورده وفلّه
كم منزل من حلة العشب عاري ×× عقب المطر يلبس من الورد حِلّه
هذي همومي ! شلت عنها الستاري ×× للي يبي يأخذ من الحزن غَلّه
والمزنة اللي كان ودي تباري ×× شوف النظر والبرق منها تسلّه
راحت وقفت عن عيوني ، وناري ×× أقفى لهبها وأظلم الليل كلّه
وأنا على حالي .. أعدد وأداري ×× في خاطري بعض الهموم المملّه
في غربةٍ طالت وطال انتظاري ×× مدري متى يفرج عن همومي الله