الله على اللي صافيات ٍ بلوفه = احدث طراز موسعات الخراطيش
هو منوة اللي في الوكاله يشوفه = سعره خيالي مايجي بالتناويش
يغلا غلى اللي نابيات ٍ ردوفه = هنوف نجد اللي كفوفه مناقيش
بنت ٍ غلاها كل شخص ٍ يلوفه = عيوف عن بعض الرجال الدراويش
وهو منوة اللي حادياته ظروفه = قرم ٍ مضرا ًٌ للسفر والمطاريش
قم يانديبي كان مثلي تحوفه = على جميح ٍ يشرح الصدر لا نيش
إخذ الكتاب اللي تنومس حروفه = ومنزه ٍ عن هرج ناسٍ مداغيش
تعبير عن ماكن صدري وجوفه = ماخالطه من زايف القول تشويش
ملفاك من يفرح بشوفة ضيوفه = جوده برد ماهوب جوده رشاريش
جــــارح ليا شان الزمان بكسوفه = حر ٍ تنقا صيدتك ياشقر الريش
أنا جرالي في زماني كلوفه = وان قلت ابصبر بس صبري على ويش
قلبي غدابه حب نجد وهنوفه = سود العيون منقضات العكاريش
ماشفت منها غير ناعم كفوفه = وصوت ٍ يهد اطويق لاقيل بشويش
ايقنت مافي حب هذي حسوفه = وقفلتها من شانها قفلت الشيش
وعفت البني من عقب نابي ردوفه = روس الضباء اللي ماوراهن عراميش
ليت القدر يجيبني له واشوفه = وارتاح من كثر العنى والمطاريش

صح لسانك
قصيدة لاتكتب بالقلم
بل تكتب بماء الذهب
تقبل مروري
وشكراً