وقت(ن) يفر الفكر فر المكينه=اليا دق سلفه وأشتعل بلفها نار
أحترت فيه وصار فكري رهينه=فرتني الأيام بسهوم الأقدار
ياحر في صدري مهاوي يمينه=أونسة من جور الدهر مطرقن حار
راح الشباب وصار شيبه رهينه=الله ولاوقتن حداني على الغار
حدتني الأيام حد السفينه=ليا حدها الربان بحبال شنكار
تلعبها الأمواج لعبة مزينه=بسيوف عطران الشوارب بسنجار
تفتل وتبرم راعني سو عينه=تفرني فرة محالن على بار
لوقلت والا قلت طالت سنينه=يطول وقت الهون دخان وغبار
يقطعك ياحظن ترخت يدينه=لوبه جهد عن ساعة الهون قد طار
وأنا على الشده ظلوعي متينه=لو سقوتي من نشلتي مر الامرار
أصبر بعون اللي ركونه حصينه=اللي كتب بلوح مؤمن وجبار
ماحسني هرجة ردي الضغينه=اللي كسب من عرض الأجواد دينار
هذا وانا بشرح معانن رزينه=لأهل الوفا والطيب بقياس وعيار
اللي يعرف أهروج من باع دينه=بالضحك والنمه وتمهيد الأخبار
ناسن تحط الثوب قبه ثمينه=ولهم على الغرات جرعه ومقدار
شواربن تضحك وعينن فطينه=زادو بها مثقال نقه بقنطار
والهرج يوخذ ماصفى من سمينه=وباقي هروج الربع ماتطفي النار
وانته وقفة بطيب وانت الرهينه=وقفت للعليا ولاقلت معذار
وكشفت طيبك مثل نور المدينه=وسلمة سلوك النور والسلك مسمار
واحتس بالي منك والله ضمينه=ومثلك يحس البال ياطيب الجار
وابيك تشرح لي بكلن وشينه=لايخلفك باالقول موشي وقمار
وأهل المثل تقول نشد جهينه=أخذ اليقين ومازكا من هل الشار
ولايشبع الجوعان شرب الشنينه=ولايبري المحرور رجواه بالثار
لكن شك القول يمي رطينه=صرت أتلمس راسي الله من العار
ومن لاحكم باالعدل نفسه لعينه=هذاك ماهوب الوسط والدن بار
وانت الحكيم وحكمكم قابلينه=أحكم بقول الله عن قول الأشرار
والحق مايضفي من الله ثنينه=وانا بوجهك عن نمة كل غدار
واليا نسيت الرجل طالع خدينه=يكفيك ذكر الرجل لاصرت محتار
ويكفيك من عرفه ذكر والدينه=وأقل حاجه جربه قبل الأذكار
وأختومها ذكر الولي محتسينه=اللي خلق خلقه على سبعة أقطار
اللي خلقهم بين نونه وسينه=أرفع حجاجي له وأصلي بالأسحار
عساه يرحم من تزايد ونينه=ياغافر الزلات رحماك مختار
أنت الكريم وعفوكم مرتجينه=أستر عليه حي وأن مت غفار