مطلق الثبيتي ورزقان الحمياني
 

أخواني أعضاء وزوار منتدى قبيلة عتيبة الهيلا
السلام عليكم ورحمه الله وبركاته


أقدم لكم هذه المحاورة بين العمالقة مطلق الثبيتي رحمه الله ورزقان الحمياني جرت في الطائف


مطلق الثبيتي:

مرحبا ترحيبةٍ يطرب لها القلب المعنا==المعنا من همومه والمعنا من زمانه
أنت يارزقان سجيت القدم وأبعدت عنا==وش بلا اللي كل مازلت سنه غير مكانه

رزقان الحمياني:


البقا بك يالمرحب والوفا منكم ومنا==والرجال أهل الوفا كلن على قدره وشانه
ماتتيه أفكارنا لو كان حطينا وشلنا==عان بيتي جنب بيتك ياطويل العمر عانه

مطلق الثبيتي:

وش تسوي لو تجيك عيالها منا ومنا==يتبعون الفارس اللي يقطع الفرجة حصانه
تنقل المشعاب والمشعاب مارأسه محنا==وإن رفعته فوقهم حطوك في دار الحضانه


رزقان الحمياني:



لو تجي من كل جانب مازملنا مازملنا==البعير بعيرنا ومجود شداده بطانه
أرفع المشعاب وقلوب الأوادم ترجهنا==وأنت خلك طول عمرك تحت ظل الخيزرانه

مطلق:


من قديم الوقت ماأوحينا لكم نجرن يدنا==ماسمعنا غير صوت البوص مع صوت الكمانه
عودوا مع ربعكم والكيف من هيل وبنا==خير من دارن بها مدري شرف ولامهانه


رزقان:

أنته أصقه وأنته أعمى ماتشوف الله يامنا==داخ رأسك يوم تصفق به في حرب وفي جهانه
السماء هذا سمانا والوطن هذا وطنا ==بس لايطغى على قلبك حسد ولا لعانه

مطلق:

والله إنا مانبا تكثر حمولك ياجملنا==والبعير اليا تعب ماله قراش ولاصيانه
القصور نشوفها لكن فيها مادخلنا==جوفها داب عمى يظهر مع الطاقة لسانه


وجعلكم سالمين

مشكور على نقل هذه المحاورة الراااائعة

و رحم الله دكتور المحاورة مطلق بن حميد الثبيتي

و البقاء للشاعر/ رزقان الحمياني

ياليت يتم تفسير المحاورة يالربع

لاهنت على النقل

الشاعر رزقان الحمياني من مطير


وحسب ما نسمع ان بعض الحميه جلوا قديماً وصاروا مع مطير وهم أصلاً من الحميه من الثبته

هذا اللي يقصده مطلق رحمه الله بالبيت الموجود اعلاه (( حسب ما اتوقع والله اعلم ))

اشكرك على مرورك

اول شي عندي سوال: رزقان الحمياني عتيبي ولالا؟؟ ابي معلومات كامله


عنه وعن قبيلته .. انا اول مره اسمع فيه وهو شاعر .. ودي اتعرف عليه اكثر

رزقان بن حضيض الحمياني المطيري


وحسب علمي انه من سكان الرس


شاعر كان له صولات وجولات ولكن م يوفق أعلاميا



والله إنا مانبا تكثر حمولك ياجملنا==والبعير اليا تعب ماله قراش ولاصيانه
القصور نشوفها لكن فيها مادخلنا==جوفها داب عمى يظهر مع الطاقة لسانه




رحمك الله يادكتور الشعر عز الله من عقبك وعقب صياف مال الشعر طعم ورونق