وش حيلة اللي فالمحبه تورط = مع واحد(ن)فالحب له 10 انماط
كل يوم له حاله وحاله وما قط = ثبت عياره عند 20 قيراط
الهم وسط القلب رسى وبلط = كنه شريك الروح في عيشتي قاط
والعقل منى طار والقلب خبط = والسبة اللي طبعها طبع مطاط
ترف رماني فالمحبه وخطط = ينسج شباك المصيده خاط في خاط
ولا دريت بروحي الا مربط = وانا احسب اني عن هوى البيض محتاط
بعيون نجلا والجديل الممشط = العين فيها اغلال ورموشه اسياط
لاهو بمليان(ن) ولاهو معرمط = مربوع لا قصر(ن) ولا طول بفراط
الخصر عنق الوز والصدر كالبط = واذا مشى تك..تك ماهو ببط.. باط
من شفتيه الذوب والخمر نقط = من ذاق طعمه ماج راسه ولا حاط
لا فاليمن زينه ولا فاهل مسقط = ولا فالعراق وفاهل تونس ودمياط
لو شاف زينه عود فاني تنشط = والبرتقاله ان شافته جالها احباط
ان غاب عن عيني سريت اتخبط = مثل بعير(ن)صايبه جن اشباط
واليا ذكرته فاللحاف اتقرفط = يا كن خابطني على القلب مخباط
وليا لبس ثوب(ن) مشحط مقحط = ما كنه الا مخيط ابجلده اخياط
قلب كياني حاس بالي ولخبط = ما كني الا عبد ناوي على ارهاط
له وسط قلبي مجلس وله مقلط = والناس تغبطني على حبه اغباط
بالورد والريحان والفل محوط = ومن حوله الحراس جند(ن) وضباط
يلعب بقلبي لعب كوره على الشط = والاعبه ويفوز في كل الاشواط
والمشكله ياناس لعبه ورا الخط = كل الكور برا وانا احسب له انقاط
احرق بقلبي لين دخن وشيط = قلبي غدا له جمر والضلع ملقاط
ازعل عليه احيان واسب واسخط = واحلف يمين اني لشيط به اشياط
وان سلهمت بالعين قمت اتخريط = ويقول كنت اتقول واقول خراط
خلي على الزينات غبر وفحط = فرس وعرب سنه وشيعه واقباط
بس العباطه فيه عيب ايتعيبط = عنيد و مزود على عنده اعباط
يخطي وثم ايقول ماخطي ولا اغلط= وياكثر ما يخطي وياكثر الاغلاط
وان جيت ابا اراضيه قام ايتشرط = املا له اكياس(ن) واعبي له اشناط
كنه طفل لعطيته الديد قرط = وان شلت عنه الديد جننك بعياط
لن شفت لك رجال قام ايتصخط = له خاطر(ن) مكسور وعيون نفاط
اتهرجه وتقول كنه محنط = واليا انتبه الهرجتك صابه امغاط
حق واعلم انه فالمحبه تمرمط = امرمطه فالحب لباس الاقراط

المشاركة الأصلية كتبت بواسطة اخطار برقاوي ابو وافي الحمدلله على السلامه ومن حضر حضروك الجميل كنه لم يغيب قصيده فريده من نوعها الرتبط بها الحس الفكاهي والمفرده الريعه وكان قاف فيه من الصعوبه الجميله تقل تحياتي

المشاركة الأصلية كتبت بواسطة الفراهيدي ابو وافي الحمدلله على السلامه وصح لسانك مليون الله ماقرات مثل هذه القصيدة لا قليل قصيدة رائعة وجميلة جدا جدا وأسمحلي اقراها مرة . ومرتين . وثلاث . وأربع ......................