واجفني اللي مايوني رقيفه=واعيني اللي طرفها تقل مطروف
من جمها مباقي الا غريفه=هداجها الفائض من النزف منزوف
غابت عن العين الحياه المريفه=واقبل عناها واستضامت من الخوف
كيف الخروج من السنين الكليفه=اللي بها قلبي معذب وملهوف
اوراء الجلدظاهر ونفسي معيفهّ=عزاه انا من جور الايام مكلوف
دنوا الي الصفرا الشراع العسيفه=العلم واضح مايبي رمز وحروف
بقطع عليها لليفاف المخيفه=واما عطت وادي عطت راس شفشوف
والاشرفت في راس عيطا منيفه=وامست على قفرا من النزل مزلوف
قفراخلى غادا سوات القطيفه=بكر عليه السوم و اليوم مصيوف
بقفي عليها لو عيوني كفيفه=ولو واجهت نفسي عواريض وصدوف
بعد الديار ولا النفوس الضعيفه=ماني على سجات الاقدام موقوف
حرصي على جزل الهروج الطريفه=بعد العتيم بحضرة اكرام وضيوف
بعدي على عن اصحاب الهروج الصخيفه= هذارة المجلس على غير مصروف
وحبي لمحبوبا حيله وصيفه=ريميتا قادت ثمانين مألوف
ولو فارق المالوف شوفت وليفه=جاله على البيداء عواريض واصدوف
لي صاحباً عيني تسلى بطيفه=بالليل ولا لصحبت شافته شوف
وكل لياجيته توشح لسيفه=ولو رحت مطريته يقولون معرُوف
لاتنشد المشطون عن كيف كيفه=فالوجه شارات تدلك على الجوف
وانا من اسلافه مانيب بحليفه=وانا المولع في هوى ناهي النوف
ولو ماعقول اهل الموده نظيفه=لتاق عقلي وانخطف خطف مخطوف

الشاعر / بجاد ابوديه العتيبي