ماهي بسوق البيع ياباغِ الاشعار = ياللي جزيل الشعر مني تسومه
الشعر عندي در من عمق الابحار = صعب ٍ على مثلك وتجهل علومه
وإن كان تعرف ناس للشعر تجار =تلقى عميلك كان شعره ترومه
يعرض لك الموجود عنده وتختار = مايبلش الغسال كثرة إهدومه
ناسٍ خبول وصارت اليوم شعار = من كثر دفع المال بس إمخدومه
ذولي لهم حلقه وكبره ومضمار = وحراج فرد وبيع جمله وكومه
صك اتصالك جاتني جملة افكار = راس الهرم صعب ٍ لمثلك يهومه
الشعر تاريخ العرب سيرة احرار =ميراث وقت ٍ راح واقفت إرسومه
والشعر سيرة متعب ٍ قحص الامهار = مؤسس لنا دولة كيان وحكومه
الدوله اللي خيرها عم الاقطار =مهبط وحي وامن ٍ عسى الله يدومه
من دونها شعري براكين وإعصار = وفي حقها شعري يضفي إكمومه
والشعر هو تفريج فكري اليا احتار = ليا دار هاجوسي وكثرة إهمومه
إما وصايا والد ٍ عاطف بار = يوصيك في دينك وبام ٍ رحومه
واللا وصية ركعتين ٍ بالاسحار = قبل شعاع الشمس يخفي إنجومه
والا بوصف ادلال تجذى على النار = في مجلس ٍ مدهال جلسه وقومه
رمز الكرم معنى الوفا طيب الاذكار = عز الرجال اللي بنوله إرجومه
وفي عشرة الطيب وفي جيرة الجار = هذا مجال الشعر واجزل إعلومه
واللا غزل في شمعة الحي والدار = فيها خشون الشعر يصبح نعومه
الجادل اللي مبعده عن هل العار = مأخذ شيوخ عن الرذال إمحشومه
جيل ٍ توارث جيل غايب وحضار = الحر حر وغاذي البوم بومه
لاتتصل ياتايه الفكر تكرار = نيتك شانت والبيوت إمهدمه
شعري واله عندي معزه ومقدار = هو عقب هذا كيف شعري تسومه