الهيـــــــــــــلا *** منتدى قبيلة عتيبة

ياذيب جر العوى وأزعجه وين .. وين العوى ياذيب صوتك عشقناه
جره وانا بهديك من القلب بيتين .. نذكربها ياذيب قاف(ن) بديناه
أبذكر الخافي وماشافت العين .. واللي جرا للقلب من جور دنياه
وجاوبك بألحان حزن وعناوين .. لين الدموع تفيض والهم نجلاه
الذيب لو يشكي شكا هم ثنتين .. أما بلاه الجوع أو قارصً جاه
لا وهنيه يوم يرقا الجبل لين .. ياصل طويل ويزعج الصوت بعواه
مير البلا منهو همومه ملايين .. لو تنجلي مليون ملايين تتلاه
الهم في صدري كتب له دواوين .. ومماكتب يصعب على القلب ينساه
لو بشتكي همي لقاضي المساجين .. برا الجميع ومؤبد السجن نجاه
حتى الرضيع اللي على الوقت يومين .. يشيب راسه خايف الدور ياطاه
وقتي كما الشعب المعنا فلسطين .. والحظ له شارون وبانت نواياه
وياويل من حده زمانه على أثنين .. حظاً ردي ولا عضيدً تناساه
وصارت حياته تجتول بين نارين .. نار الامل مع نار علماً تحراه
ويالعنبو حرً تلولس بلا سيم .. يصنع جميل ويحسب الناس تقناه
أشرب هماج أليا تعانقت مقفين .. وألقى القراح أليا توكلت برضاه
عهداً علي والعهد في وقتنا دين .. لأحزم صليب الراس ومافات بنساه
وأشيل أنا حظي فوق الذراعين .. وأصيح أنا بالصوت يارب ممشاه