البارحه في مسا الجمعه وانا راقد= حلمت لي حلمٍ ازعجني وصحاني
وصحيت مرتاع مدري ويش انا فاقد= سيارتي بيتي فلوسي حدى اخواني
لاوالله اغلا ياوالدتي او الوالد= اي والله ابوي بس ابويه الثاني
يارب تجبر عزا الامه فابو خالد= سلطان لكن ماهوب اي سلطاني
سلطان غيث البلاد العالم الزاهد= عز الصديق وللاعداء سم ثعباني
الصافي الوافي اللي راكعٍ ساجد= ابو اليتامى ومغني كل فقراني
ايجاهد بجيشه عن الدار ويجاهد= الفقر والجهل والتخريب مجاني
تشهد له الناس واكبر مثبت وشاهد= فعله وطاريه فانحى كل الاوطاني
عجز القلم والشعر والصحف والناقد= تحصي فعوله وحارت فيه الاذهاني
اللي مسمى على اسمه فالبلد واجد= كلٍ يبا ابنه يجي مثل كحيلاني
لكن ماضنتي منهم ولا واحد= يقدر يسوي سواتك يابليهاني
الله يرحمك ياسلطان ابو خالد= وجعلك بيوم القيامه تبعث اجناني
والله ايطول بعمر الوالد القايد= اسنين ولا مصير اللآدمي فاني
حنا بعهده بنعمه والامن سايد= والنا الفخر تحت راية طير حوراني
عز الله انَ مانلقى مثل ابو عابد= واخوانه احمى البلاد اطوال الايماني
ويارب تجبر عزا الامه فابو خالد= وتعز عبدالله ونايف وسلماني

المشاركة الأصلية كتبت بواسطة محمد الذيابـــي (المشاركة 1244073) ,, صح لسانكـــ,,,, ورحم الله فقيد الأمه سلطان بن عبد العزيز وأسكنه فسيح جناته,,,,

المشاركة الأصلية كتبت بواسطة فيصل مطر (المشاركة 1244222) صح لسانك لوعندك أرداف الوقفه على ابوخالد ولاكن الابيات بشكل عام رايعه وروعةالروح الوطنيه عندك اظفت الروعه اكثرت لاهنت والله يرحم سلطان تقبل مروري

المشاركة الأصلية كتبت بواسطة حمود بن خيشوم العصيمي (المشاركة 1244224) صح لسانك ياقيس والله يرحم الفقيد تحيتي