قصيدة مهداه للشيخ طويق ابن طويق
 

هذه القصيده اهــداء للشيخ // طـويق بن مقعد ابن طويق ..
بمناسبة مشاركة إبله بجائزة .الملك عبدالعزيز آل سعود يرحمه الله وهي مشاركه مشرفه لقبيلة عتيبه الهيلا عامه
المقامه بام رقيبه لعـام 1432 هـ و1433 هـ
وفــالـه التوفيق ....



1-سلام ياشيخن على ســاس شيخــــان
شيختك ورثن من قديم الليالي

2ـ جت بالفرس والشلف والسيف شامان
ماجت بحبة خشم ولا احتيالي

3ـ سلام ياابـــن طـــويق من قلب ولسان
سلام في حضرة مقامك يقالي

4ـ اعداد مالــــبوا وطافــــو بالاركــــان
يرجون رحمت ربنا خير والي

5ـ وتو الشعر مـازان والـــمدح مـــازان
والمدح مايصلح بلــــياء مجالي

6ـ الا بمـــــثلك يـــســــتوي ياكـــحيـلان
يامنومس الهيلا على كل حالي

7ـ ياطويق شيخن منهجه للعرب بــــان
منهـــجك مثل الجدي دايم يلالي

8ـ شيخن بــنى في قـمة المجد صيـــوان
ومع الكرم والطيب حسن القبالي

9ـ ولاصك بيـــته دون جـــارن وضيــــفان
يلفي عليه الاجنبي والـــــموالي

10ـ في وسط مجلس للمطاليق عنـــوان
والكيف الاشقر وسط صفرالدلاالي

11ـ مع عود جاوي فيه من غال الاثمان
جابه عسى عمره سنين طوالي

12ـ وصينيتن فيها مفاريد قعدان
وحيلن عليها من جزال الحلالي

13ـ وعطيته تغـني من الناس فقران
الى عطا الله منه يعط الجزالي

14ـ وفعله تحدث عنه اجانب وعتبان
وسموه هداج الغزير الشمالي

15ـ والي نشأ مثلك على الطيب لاهان
نلت المعالي ياوريث المعالي

16ـ باول شبابك ياعسى عمرك ازمان
والرجل باول شبته مايبالي

17ـ فعلت فعلن يتعب طوال الايمان
وهاذي عوايدكم على اول وتالي

18ـ وانتم هلاالوقفات من ماضي الازمان
يوم الليال الماضيه والقتالي

19ـ واخترت بالبل لون من خير الالوان
الوضح نهابة قلوب الرجالي

20ـ ولا يشتقي بالوضح ناقص وجابان
الوضح يرخص دونها كل غالي

21ـ وضحن كما لون البرد عقب هتان
من مزنتن للبرق فيها اشتعالي

22ـ مكاسب الشيخان والفعل برهان
باام الرصاص وموردات السلالي

23ـ هاذي مكاسبهم على عصر بدران
والي جهل فعل النشامى يسالي

24ـ ولاجات للي عنده البنك مليان
لاصار مايقدر يهين الريالي

25- يموت ذكره لو بقى حي خبلان
مايعرفه كود مرته والعيالي

26ـ وانتم شيوخ الي يهزون الاكوان
الاد حافي محتمين التوالي

27ـ يشهدلهم دمخ المسمى وثهلان
بوقعت نطاق الي تهز الجبالي

28ـ يوم اخصماهم جو بسنان وعنان
يبون نوقاتن عليهم غوالي

29ـ رمو عمايمهم وحان اللقى حان
وقصيدة اليابس دليل المقالي

30ـ مافيه رحمه دون حلوات الالبان
كلن بما يمللك يمد الحبالي

31ـ من الفجر والجو عجن ودخان
لين النهار اقفى ومال الضلالي

32ـ هذا بوقتن فات واليوم صدقان
من فضل ربي ثم حكمن عدالي

33ـ صرنا بوسط الملكه ربع واخوان
والجهل راح وبيرق الدين عالي

34ـ والشعب والحكام للخير عوان
عوان ضدن للفتن والضلاالي

35ـ وصلو على اللي وضح اركان الايمان
عــدادمــايطـلع علينا الهلالي

36ـ على الرسول افضل بشر نسل عدنان
وانــــا فـــداه بــــكـــل مــالي وحالي



الشـاعـر :مسعود بن جحيش ابن كريوين الغبيوي ..

صح لساااااااااانكـــ

والشيخ طويق يستااااهل

لكن مكان القصيدة المناسب هو منتدى قصائد الاعضاء.


لا هنت يامسعود...

صح ابدانكم جميعا ومشكورين

صح لسانك
ويستاهل الشيخ ابن طويق

صح بدنك اخوي عايض ومشكوووووور

مشكورين جميعا لردودكم وبيض الله وجيهكم

صح لساااااااااانكـ

صح بدنك اخوي سعد ومنور