نـــاسٍ على البــآل
 

عسى السحاب اللي تنافض بروقه = يسقي وطن ناس ٍعلى البال يامنير
ينشي من القبله رياحه تسوقــــه = ويفجر الوديان بالسيل تفجير
غثوه على روس الزباير يحوقـــــه = ومن البرد تسمع وزيز العصافير
ينصب ماه و يردم المزن فوقـــه = واللي من المنشا قنوفه مناحير
يحيي الهشيم اللي تهالك عروقه = ويملى الفياض و تمتلي بالنواوير
دار ٍ عليه القلب كثــرة فتـــــوق = من كثر مأغليته شربته تفاكير
فيه ادعج ٍ كبدي عليه محروقـه = ان ماسقاني من ظما طحت فالبير
ياكثر ماعانيت من طيب ذوقـــــه = دايم عن الجمه ورودي مصادير
اوفيت له ما خصني من حقوقه = وانا بخسني من حقوقي قناطير
لو كان طير ارهيت لك في لحوقه = لكن طير ٍ يجرح الطير ويطير
ولو كان طيري كان ماطلق سبوقه = لو الحباري في قصاده مخامير
اخاف من عين الحسد لا تعوقه = ومن نظره ٍ فيها تضيع التباصير
وادراه من هجرج ٍ تلاوك شدوقه = منضوح قلبٍ لونه اسود من الكير
تركض به العدوان غدره و بوقه = من حقدها ترخي عليها الدناقير
و انا مأحب الشين بره و سوقه = سوق الرداء دايم وفوده معاثير

بيض وجهك ياسعود قصيده رائعه صح السانك

صح لسانك يابو حباب

تحياتي لك

..


صح لساااااااااااانك ياسعود


ولا هنت يالغالي

صح لسااااااانك ياراعي الذود وعساهه يربع

الاخوآن الاعزاء شكرا على مروركم
ودمتم