الهيـــــــــــــلا *** منتدى قبيلة عتيبة

محتار في حق دنياه

ماكل من دور على شي يلقاه
وماكل من ضاعت حقوقه لقاها
مسكين عايش بين همه وبلواه
محتار في دنياه لو مارضاها
اللي سكن في غربه بهم دنياه
دنيا غريبه مادرى وش وراها
الله يعين اللي على الرب مشكاه
مادور أرزاق الخلايق وجاها
ينوح طول الليل يامكثر بكاه
يسجد ودمع العين ياكثر ماها
على خدوده شفت حزنه وشكواه
يطلب بكف وكف دمعه غشاها
الله يحقق كل مطلب تمناه
ويعجل القسمه تجي من سماها
ماقد تعود شيخ ياخذ عطاياه
ولا من المنات عاش بهواها
مضن من ياقف يسوي سوياه
شال الحمول اللي طفح مستواها
له هيبته بين العرب قيمه وجاه
لو أنحرم في فرحته مالقاها
هب الهوى من كل صوب وتعداه
حن وتوجد دنيته وش رماها
مايدري من الحظ سيفه ومعناه
ولا من الحساد ذا مبتغاها
مايدري من الرمح ولا بشلفاه
أصاب بين ضلوع تشكي عناها
ياوجد قلبي وجد من تاهت خطاه
ودموع عينه عبرت عن شقاها
يحن قلبه حن من ساس مبناه
مهما تذكر ديرته مانساها
يحلم عسى حلمه محقق بدنياه
كلن يعرف حقوقه ولا غواها
اللي مشى في خير تسلم لنا يداه
أخير من دنياه يمشي عماها
يازين قول الحق ياناس زيناه
مايزعل اللي قدرها مستواها
ياحلو تفصيل الخبر كان ماحلاه
الله يعز الكلمه ومن حماها

الـشـاعـر حـمـود عـبـيـد الـعـازمـي