لك خفوقي والمشاعر ومابقى لك من حناني = وانتهت رحلة شعوري في غيابك يالحبيبه
ماتت احلام الطفوله وانقطع حبل الاماني = وصاحت جروحي علامك تنبش جروحٍ عطيبه
آه ياحـزن العتيبي .. آه يادمعة زماني = صبروني ياخوالي عزوتي جبر المصيبه
اصفق اكفوني واعاتب ضايعٍ وحدي بمكاني = ماهقيت الراس يكشف من خفايا السود شيبه
عودي الاخضر يباسه انكسر بي ثم طواني = صفحة الذكرى الاليمه نارها تحرق لهيبه
طاحت نجوم الليالي وانصهر كوني يعاني = والقمر نوره تلاشى اندثر واعلن مغيبه
الدقايق تسجن بضيقة عقاربها الثواني = والزمن وقف يناظر روحي بظلمه نهيبه
مابقى للحرف مخرج يعجز بنطقه لساني =الشلل بفصح هروجي يشنق اللهجه العريبه
اعتزل مني وجودي وانهمر يشطب محاني = راجعٍ ياطول ذيله جرجر الحسره بخيبه
والفرح حرك جيوشه خارج حدوده نفاني = وانطلق خوفي وجفافه بالصحاري يمتطيبه
حظي الاعمى عماني وظرفي القاسي حداني = الله الشاهد من لجاله هو حسيبه
حسبي الله هو حبيبي الله اكبر وش بلاني = ترجف الخطوه وعزمي لو تركني ما اسيبه
النهايه بالبدايه تنسج بثوبٍ رمـاني = تنهمر عين الحقيقه وبأسفل الوادي تهويبه
وتتركه عاري حريره شوكها بأرضي وطاني = حايرٍ سوق المزاد بايعٍ مايشتريبه
الوفا طبعي تباها شيد قصور ومباني = والكرم حرٍ ملكته واجبره يدفع ضريبه
والصدق ساسٍ يلفه سيف حرفي بالمعاني = ومن شكالي كنت عونه مداويٍ جرحه طبيبه
ثابتٍ مثل الجبال الشامخه وعدي هواني = والعهد يضمن مخافه طمن شكوكه وريبه
تشهد لباعي مدارس له ترابيع بكياني =يسمع الكلمه كريمه تعتليبه ../.. تنتشيبه
سيلها / مزنها / سماها قاللي اقرب دعاني = بروضها الشلال يطرب مسمعك رنة صبيبه
كم عطيت الدرب من وصل الحنايا ماعطاني = ليه انا فزعة كسير الشوق عز ما ينتخيبه ؟
مانسيت الحب يذكرني ترى هو مانساني = يعرف إني في بحوره ارسل امواج تعتيبه
ولتجاره في احاسيس السفن مرسى ومواني = خيرها عم النعيم اللي نصاها للجليبه
يا (فلانه) النور من غيرك شعوره احتواني = ترسمي بسمة حياتي وتملكي اوصافٍ عجيبه
كل مافيني يحبك ويعشقك عشق المفاني = حبك بدميتجارا والمذابيح تحييبه
يابعد عمري ونبض القلب الاخضر في جناني = لاتروحي وتتركيني خلك بجنبي قريبه
خلك بقربي تعالي قلبك الطيب حماني = من عواصيفٍ خطيره ريحها تجرف ../.. كئيبه
نور هالدنيا فقتدتك صار الاول دون ثاني = حايرٍ وقف ينادي من شظايا ترتجيبه
مايطيق البعد قلبي مايحبه مايداني = احدٍ يطيق المسافه من تباعدها تعديبه
صامدٍ صمتي وصبري ماشكيته لو شكاني = تشكس الدنيا تدور مالقت شيٍ يعيبه
والامل فب عين مرقابي صعوده مانخاني = ماعطيت الياس فرصه كيف يدينيه ويجيبه ؟
المحبه تكره الفرقا وبختي كم عصاني = الوكاد اني بنزل راسي اسفل وانثنيبه
هذي القسمه تجينا وسرها الخافي يباني = كل واحد في حياته لازم يحصل نصيبه
ليتني طفلٍ صغيرٍ بالمهد وسط الحضاني = راس ماله في حياته يبكي لشربة حليبه
مايعرف من الشقى لوعة ظروف الامتحاني = ولاتضارب في ضنونه صدمة الدمعه السكيبه
كل من يمشي عليها راحلٍ ميت وفاني = والله الجامع جموع الخلق في حضرة مهيبه
وينضرب حكم العداله بينهن قاصي وداني = وينصف المظلوم ربٍ ياخذ بحقه ينيبه
في امان الله وبحفظه تهني لك تراني = رافع الدعوه بيديني واجرها ربي يثيبه
زفت حروفي تبارك من تباشير وتهاني = راحت لغيري خطبها كل خطيبٍ له خطيبه
ناغمت ضحكت عيونك وعانفت عيني ولاني = انكر الصحبه الجميله كلها قدرٍ وطيبه
ولايهمك كيف انا بقضي حياتي لو ضناني = عمري اللي بالالم مشقوقٍ ردانه وجيبه
النتيجه بالحصيله كلها دمعٍ بكاني = ماردٍ لا مايهمه وش جنا من هالصليبه
الرماد اللي طفى جمره بقلبي كم كساني = واخر الصرخه صداها ينعكس بأقصى الغريبه