عن ابوكافه قمت ابا اخط الأشتعـار=نبذة بسيطة عن كريم الساله
عبدالله العامـر من قـريش حدار=له الفخر في نسب عمه و خـــالـه
أول من أسلم بين صبيـان و كبار=و عـمر بيوت الله من حر ماله
أبو بكر ثانـي اثنـين دخـو غـار=في موقعن لأول هبوط الرساله
يشرف على مكة من الشرق سبار=و لسان حاله جوها ما صفى له
يقول أهل مكة غدو ناسن أشرار=أنا رسول الله ماادور بداله
نعم الخوي اللي على الهم صبار=دون النبـي فادى بماله وحاله
مشى طريقن موحشن كله أخطار=في رحلتن نجاتها مستحاله
حثو خطاهم فوق حزبات الأكوار=حتى لفوا دارن ترحب رجاله
و أستقبلوهم في أول الدرب الأنصار=كلن يقول الضيف نـكرم سباله
و للدين جاهـم نصر من والي الأقدار=و برفعتن من عـند رب الجلاله
من عايشه عطـى النبي خير ماأختار=كريمتن تروي الحديث و ماقاله
و تصدق بمال الفنى سر و جهار=خوف الفقر و الجوع ما طق جاله
و روى الحديث عن النبي دعا و أذكار=و يوم ارتحل صار الخليفة بداله
حامي لوى الإسلام شهـمن و مغوار=و ليا اتجه صد العدو و ارتكا له
بمرهفاتن تودع الدم نثار=برمح الـقناء و مرهفات السلاله
اسمه مع القران يطبع بالأحبار=في جملتن تذكر محاسن خصاله
و لقبه عتيق و هو عتيقاً من النار=و يطلب له الرضوان لا جا مجاله
عتاقن في الوجه قدام الأنظار=بـين الملا ربي حباه بجماله
ولقبه صديق مصدق كل الأخبار=عن النبي لا قيل جبريل جا له
و نعم الصديق و نعم سكانت الدار=في موضعن يضفي عليهم سداله
صدقان في الدنيا و في المقبره جار=مع النبي يا كبر حظن سعى له

المشاركة الأصلية كتبت بواسطة راعي القوافي (المشاركة 1325957) صح لسانك على ما اوردت هنا يا ابن حشيان

المشاركة الأصلية كتبت بواسطة عبدالرحمن المبطي (المشاركة 1326794) صح لسانك يابن حشيان قصيده جزله من شاعر جزل بيض الله وجهك وتستاهل الفوز