توكلنا على اللي يقضي الحاجات سبحانه = تماثيل القصايد نبتديها فيه ونقوله
غني ماهو بحاجة من يعبده جل سلطانه = ملايكته تسبح له ولو مالناس صلوله
ومن بعده سلام الله على بقعاء وسكانه = سلامٍ يشمل الديرة ويشمل من سكن حوله
رجالٍ طيّبه تفتح من أجل الضيف بيبانه=مجالسهم حشى ماهيب مقفوله ومعزوله
هلا يامرحبا والشعر فيهم طابت أوزانه = قصيدة توّها بأهل الوفاء والطيب معموله
تماثيلٍ مثل حلوة نخل بقعاء وقنيانه=بقلبان الشميلي واللويمي جات مغسوله
مساء الخير من جاش الشعور ونبض وجدانه = عليكم ياهل الماجوب والقيفان مشعوله
عدد ماغرّد القمري على الأغصان بالحانه = عدد مارحّب البقعاوي بالخطّار لا جوله
تقدمت أنثر إحساسي لكم والنفس طربانه = بأهل بقعاء هل النخوة رجاجيله مع زحوله
وقفت أسطّر حروفي وارتبها على شانه = وتستاهل صفاة المجد بقعاء العز والطوله
ولا به شي مادام الأخو يفخر بإخوانه = عوايل كلّها عزّة لفعل الطيب مجبوله
بني عم وقرايب تلتقي والطيب عنوانه = صلة رحم ولقاءاتٍ بها الغايات مأموله
ذوي القربى لهم حقٍ مثل ماهو لجيرانه = حتى الدين وصّانا وكل الناس مسؤوله
عسى الله لا يفرق شملنا ويعز بنيانه = ومن فضله وإحسانه يعز الدين والدوله
وترقى المملكة دايم سنود ويرتفع شانه = تحت ظل المليك اللي جهوده دوم مبذوله
أبو متعب ملك والكل يبيه ويطلب إحسانه = مشاريعٍ بناها تودع الأفكار مذهوله
وحكومتنا حفظها الله هدفها خدمة أوطانه = هدفها دايم التطوير تروم المجد وتنوله
وصلاة الله على منهو دعى للدين وأركانه = شفيع الخلق في يومٍ يشيب الراس من هوله

وسلامتكم